Еліміздегі білім беру саласында үш жыл ішінде 400 сыбайлас жемқорлыққа қатысты құқық бұзушылық тіркелді, деп хабарлайды Express Qazaqstan.
Бұл туралы Сыбайлас жемқорлыққа қарсы іс-қимыл агенттігінің төрағасы Марат Ахметжанов еліміздің жоғары оқу орындары ректорларының қатысуымен өткен кеңесте мәлім етті.
Оның айтуынша, соңғы үш жылда 270 адам қылмыстық жауапқа тартылыпты. Олардың арасында білім вице-министрлері облыстық және аудандық деңгейдегі білім басқармалары мен бөлімдерінің басшылары, ЖОО ректорлары, мектеп директорлары және тағы басқалары бар.
Мысалы, биыл жазда халықаралық ақпараттық технологиялар университетінің бұрынғы ректоры Дамир Шыныбековке қатысты айыптау үкімі (8 жыл) күшіне енді. Ол бухгалтерімен бірге стипендияға бөлінген 1,7 миллиард теңгені ұрлаған, — деді Марат Ахметжанов.
Агенттік төрағасы сонымен қатар Қазақ ұлттық қыздар педагогикалық университетінің басшылығына және мемлекеттік органдардың басқа да лауазымды тұлғаларына қатысты университеттің жер телімін заңсыз иеліктен шығару фактісі бойынша іс тергеліп жатқанын атап өтті.