Toyota Crown топтамасының үш жаңа моделін көрсетті
Toyota Crown седаны жеке модельдік топтамаға айналатыны жаңа буынның тұсаукесері кезінде белгілі болды. Бірақ ол кезде компания кросс-седан туралы ғана айтқан, - деп хабарлайды Alashainasy.kz тілшісі Кolesa.kz-ке сілтеме жасап.
Енді Crown-ның бір-біріне ұқсамайтын өзге түрленімдерінің суретін көрсетіп, кейбір сипаттамасын жариялады.
Crown Sedan
Crown Sedan деп аталатын классикалық седан топтамадағы ең үлкен көлік болады, оның ұзындығы — 5030 мм. Бұл нұсқа алдыңғы буындағы Crown идеологиясын жалғастыратын сияқты, жақсы жабдықталған салоны мен кең артқы диваны бар консервативті автомобиль болады. Екінші қатарда қосымша функцияларды басқаруға арналған сенсор панелі бар үлкен шынтақ тірегіш болады.
Crown Sport
Toyota Crown Sport — сырт пішіні көз тартатын, салоны спорттық стильде әрленген бес есікті хетч. Мұндай Crown-ға мамандар былғарымен қапталған рөл және бас тірегіші мен бүйірлік тірегіші бар кресло орнатады. Ұзындығы 4710 мм хетчбэк Crown топтамасындағы ең шағын машина саналады.
Crown Estate
Ал универсал бастырығы мен сәл биік клиренсінің арқасында топтамада кроссовер рөлін атқарады. Toyota Crown Estate седаннан сәл қысқа (4930 мм), бірақ үлкен жүксалғышымен мақтана алады.
Барлық Crown гибрид күштік құрылыммен жабдықталады. Crown Sedan-ның жылыту элементтері бар нұсқасы болады. Седан мен хетчбэк нарыққа биыл күзде шығады. Ал универсал 2024 жылы жарық көреді. Toyota бір жылда 200 мың Crown сатуды жоспарлап отыр.
