Биылғы қаңтарда Қазақстанда шығарылғанына 10 жылдан асып кеткен 77,3 мың көлік тіркелген, деп хабарлайды Azattyq Ruhy.
Бірінші кередиттік бюроның хабарлауынша, 2022 жылдың қаңтарымен салыстырғанда елімізде автоқоқыс көлемі 20,6 мың бірлікке (немесе 36,2%), желтоқсанмен салыстырғанда 6,4 мың бірлікке (немесе 9%) өскен.
Мұндай көп көрсеткіш 2020 жылдың қаңтарынан бері тіркелмеген болатын.
«Жаңа көліктер, керісінше, аз тіркеле бастады. Олардың саны 16,6 мың бірлікті құрады. Бұл 2022 жылдың қаңтарымен салыстырғанда 147 бірлікке (0,9%) және желтоқсандағы көрсеткішпен салыстырғанда 3,8 мың бірлікке (18,5%) аз. Сонымен қатар жалпы алғанда, жаңа көліктердің сатылымы өсті: 2022 жылдың басында 3,9 мың бірлік болса, 2023 жылдың басында 10,4 мыңға дейін көбейген», - делінген хабарламада.
Барлығын есептегенде, бір айда 116,6 мың көлік тіркелді, бұл – 2021 жылдың желтоқсанынан бергі ең жоғары көрсеткіш. Ал оның 66,3 пайызы – 10 жылдан асқан көліктер. Мұндай көрсеткіш үш жылдан бері мұншалықты жоғары болған емес.