Өзбекстанда BYD зауыты салынып жатыр
Жизақ қаласында BYD Uzbekistan Factory зауытының құрылысы басталды, онда қытайлық брендтің екі электрлі моделі шығады. Бірі аспан асты елінде Destroyer 05 деп аталатын BYD Chazor седаны, екіншісі Song Plus кроссовері, - деп хабарлайды Alashainasy.kz тілшісі Кolesa.kz-ке сілтеме жасап.
Екі машина да гибрид. Chazor седанының күштік құрылымы 110 ат күші бар 1.5 литрлік бензинді мотор және 180 немесе 197 күшке ие электромотордан тұрады. Кроссовердің базалық нұсқасы осыған ұқсас агрегатпен жабдықталған, ал үздік түрленімі 139 ат күшіне ие ІЖҚ және екі электромотормен жүреді (жалпы қуаты 500 күш).
Жизақта BYD зауытына арнап жаңа ғимарат салмайды. Компания жұмыссыз тұрған Jizzakh Auto корпусын алады
UzAuto Motors және BYD Auto бірлескен кәсіпорны әу баста ірі торапты әдіспен көлік шығарады, ал кейін дәнекерлеу, шанақ бояу және шанақ қалыптауды қамтитын CKD әдісіне көшеді. Зауыт биыл күзде жұмыс бастайды. Нысан жылына 50 мың автомобиль шығара алады.
BYD Song Plus
BYD маркасының гибриді мен электромобилі Өзбекстанда ресми сатылып жатыр. Олардың бағасы биыл наурызда белгілі болған, ал BYD Өзбекстанда зауыт ашатынын қаңтарда хабарлады. Бұл қытайлық компанияның өз елінен тыс жерде ашқан алғашқы бірлескен кәсіпорны саналады.
