«Королланың» жаңа буыны қандай болады
«Королланың» қазіргі нұсқасы 2018 жылы жарық көрген, ал былтыр рестайлингтен өтті. Демек жаңа буыны 2025 жылдан ерте шықпайтын шығар. Бірақ фирмалық дизайндағы соңғы жаңалықтар мен Toyota топтамасындағы техникалық өзгерістерді ескере отырып, модель жайлы алдын ала болжам жасауға болады, - деп хабарлайды Alashainasy.kz тілшісі Кolesa.kz-ке сілтеме жасап.
Дизайнерлер Crown моделінің стилистикалық ерекшелігін негізге ала отырып, 13-буындағы «Королла» қандай болатынын болжап көрді.
Суреттен Toyota Corolla-ның аэродинамикасы жақсарып, сәнді бола түскені байқалады. Шанақтың алдыңғы бөлігі электрлі Toyota bZ топтамасын еске салады, бірақ ірі ауа тартқыш капот астында іштен жанатын қозғалтқыш тұрғанын аңғартады.
Келесі «королла» гибрид болатыны анық. Corolla марканың ең маңызды модельдерінің бірі, сол үшін оны толық электрлі моторға ауыстыру оңайға соқпайды.
Компания басшылары Қазақстан сияқты экологиялық таза көлікке ауысуға дайын емес елдерде де «королла» жақсы өтетінін ескеретіні анық.
Corolla — әлемде ең көп сатылған автомобиль, 1966 жылдан бері оның 50 миллионнан аса данасы өтті. Модель жақын арада көшбасшы орынды ешкімге бермейтін шығар.
