Cybertruck салонының алғашқы суреті жарияланды
Үш жыл бұрын жұрт назарына ұсынылған Tesla Cybertruck-тың кабинасы түскен алғашқы фото жарияланды, - деп хабарлайды Alashainasy.kz тілшісі Кolesa.kz-ке сілтеме жасап.
Бұған дейін қараңғыланған әйнектен интерьерді көру мүмкін болмаған. Жақында Калифорнияның Монтерей округінде өткен Элкхорн аккумулятор бекетінің ашылу рәсімінде пикап салонын адамдар суретке түсіріп алыпты.
Салонда бұрыннан таныс мультимедиа планшеті мен жаңарған Tesla Model S-тегі секілді штурвал көзге түседі, бірақ қауіпсіздік жастығы жоқ, бұл оның прототип екенін білдіреді. Фотосуреттен салон өте қарапайым екені байқалады, экран астындағы ортаңғы консоль де қазірше тым қарабайыр, артқы көрініс айнасы мен сезгектер жинағы жоқ.
Бірақ аспаптар панелі мен ірі шынтақ тірегіштің дизайны жетілдірілетін шығар.
Суреттерге қарасақ оны премиум көлік деуге мүлде келмейді, бірақ Cybertruck клиентті өзге қасиетімен қызықтыра алады.
