Биыл Халық қаһарманы, Қазақстанның Халық әртісі, таңдайына бұлбұл ұя салған біртуар әнші Роза Бағланованың туғанына 100 жыл! Осы мерейтойға орай Нұр-Сұлтан қаласы әкімдігінің қолдауымен "Айналайын, халқымнан еркелеткен" атты концерт ұйымдастырылуда.
Екінші дүниежүзілік соғыс кезінде әнімен сарбаздарға рух берген, қазақ ән өнерінің тұтас бір дәуірін қалыптастырған Роза Тәжібайқызының 100 жылдық мерейтойына орай өнегелі өмір жолы мен шығармашылығын насихаттау мақсатында көптеген іс шаралар ұйымдастырылады деп күтілуде. Осы орайда аталмыш іс шара солардың басы болмақ.
Сахна сандуғашы 1922 жылы, қаңтардың 1-і күні Қызылорда облысы, Қазалы қаласында дүниеге келген. Өнер жолын Ташкент филармониясының ән-би ансамблінде бастаған. Сол ансамбльмен ІІ дүниежүзілік соғыс жылдары майдан даласында өнер көрсеткен. Роза Бағланова майдан шебінде қойған концерттерінің құрметіне "Жауынгерлік ерлігі үшін" медалімен екі мәрте марапатталған. Марапатты атақты әскери қолбасшылар К.К. Рокоссовский мен И.С.Коневтердің өздері табыстаған. Сахнадан бастап, соғыс даласына дейін әніне бөлеген күміс көмей әнші 1945 жылы 9-мамырда Берлиндегі жеңіс концертіне қатысқан. Кейін өнерін бейбіт күнде жалғап, 1947 – 1949 жылдары Қазақ опера және балет театрының, 1949 – 1960 жылдары Қазақ филармониясының, 1960 жылдан Қазақконцерттің әншісі болды. Тұтас қазақ өнерінің қалыптасуына ықпал етіп, ұлттық ән өнерін дамытуға үлкен үлес қосты.
Роза Бағланова қазақтың халық әндерін, замандас композиторлар әндерін, шет ел халықтарының атап айтар болсақ венгр, өзбек, қырғыз, тәжік, украин, грузин, Әзірбайжан, корей, қытай, моңғол, орыс, үнді, чех, швед, т.б әндерін нақышына келтіре орындаған.
1946 жылы Мәскеуде өткен Бүкілодақтық эстрада әншілері байқауының дипломаты, 1949 жылы Бухаресте өткен Жастар мен студенттердің ІІ Бүкіл дүниежүзілік фестивалінің лауреаты атанды. Ленин, Еңбек Қызыл Ту, "Халықтар достығы" ордендерімен, "Шапағат" медалімен және көптеген мемлекеттік марапаттардың иегері аталған. 1996 жылы Қазақстанның Халық Қаһарманы атанды.
Аңыз әнші, Роза Бағланованың 100 жылдығына арналған концерт Нұр-Сұлтан қаласы, "Бейбітшілік және келісім сарайында" 13-наурыз күні сағат 18:00-де өтеді деп күтілуде. Әншінің әнін сағынған тыңдарман осы күні жоғарыда көрсетілген мекен жайды бетке алса болғаны.
Ерзия Ерсұңқар