«Қазгидрометке» 100 жыл!
Биыл елімізге Қазгидромет атауымен таныс ауа райын бақылау мекемесінің де 100 жылдығы! 1922 жылдың қаңтарында Орынборда қазақстандық метеорологиялық бюро (Қазметбюро) атымен алғаш рет құрылған.
2022 жылы 100 жылдығын атап өткелі отырған «Қазгидромет» кәсіпорнын осы жылдар аралығында кәсібін қатардағы метеоролог болып бастаған Данара Әлімбаева басқарып отыр екен. Бұл туралы Экология министрі Серікқали Брекешев өзінің Twitter парақшасында жазба қалдырған.
«Биыл «Қазгидрометке» 100 жыл! Қызметін қатардағы метеорологтан бастаған Данара Әлімбаева жайлы да ерекше айтқым келеді. Бұл - мекеменің 100 жылдық тарихындағы бірінші жайт» - деп атап өтті ол өзінің жазбасында.
Айта кететін жайт, Қазақстан аумағындағы алғашқы метеорологиялық бақылаулар ХІХ ғасырдың ортасынан басталып, 1848 жылы Қазалы, 1854 жылы Семей, 1856 жылы Ырғыз және Қызылорда, 1859 жылы Алматы және Орал станцияларында тіркелген. Осылайша ХХ ғасырдың басында 28 станция жұмыс істеген.
Ал бүгінгі күні жерүсті бақылау желісі 347 метеорологиялық станцияны құрайды. Бұл Қазақстан аумағын 78% метеорологиялық мониторингпен қамтиды деген сөз. Еліміздің өз ауа райын бақылау орталығының қоғамда маңызы зор!
Ерзия Ерсұңқар
