Жаназада оқ атқан қылмыскер ұсталды

Алматы облысында жерлеу рәсіміне қатысып жатқан бір топ адамға оқ атқан қылмыскер­лердің біреуі қолға түсті. Бұл туралы Алматы облыстық ІІД мамандары хабарлады.

Тәртіп сақшыларының мәліметінше, оқиға  қыркүйектің 15-інде болған. Алма­ты облысы Талғар ауданына қарасты Нұра ауылында белгісіз біреулер қайтыс болған азаматты жерлеу рәсіміне қатысушы­ларға қарсы оқ атқан. Нәтижесінде тұрғындардың біреуі сол жерде қаза тауып, ауыр дене жа­ра­қатын алған тағы екі адам аудандық ор­талық ауруханаға жеткізілді. «Оқиға ор­ны­нан Макаров тапаншасының 7, «Стражник» та­паншасының 6 және 16-калибрлі мыл­тық­тың 1 оғы табылды. Әрі оқиға болған маңайды тексеру кезінде қамыс арасынан іздеуде жүрген «Нива» көлігі табылды», – дейді Алматы облыстық ІІД бастығының орынбасары Берік Қожамбердиев.
Берік Қожамбердиев, Алматы облыстық ІІД бастығының орынбасары:
– Тексеру барысында қылмысқа қа­тысы бар төрт ауыл тұрғыны анықталып, оларды іздестіру материалдары ҚР ІІМ барлық қалалық ішкі істер бөлімдеріне жіберілген болатын. Жедел-іздестіру шаралары барысында тұрғындарға оқ атушылардың біреуі ұсталып, Талғар аудандық ІІБ уақытша ұстау изоляторына қамалды. Қазір оқиғаға қатысты қалған күдіктілерді іздестіру, ұстау шаралары жүріп жатыр. Айта кету керек, оқиғаға қатысушылар  қандай да бір ұйымдас­қан қылмыстық топ мүшелері емес. Ал­дын ала тергеу амалдары бойынша, қыл­мыс жеке бас араздығынан бол­ған.