«Ынтымақты отбасы» сайысының берері көп
Жақында Алатау аудандық №82 жалпы білім беретін мектептің 4 «А» сынып оқушылары арасында «Ынтымақты отбасы» сайысы өтті. Сайыс барысында оқушылар мен олардың ата-аналарының күнделікті оқу бағдарламасы аясында өтілетін сабақ тақырыптарымен қоса, ұлттық әдет-ғұрып, мақал-мәтел, танымдық сұрақтарға қатысты жауаптары сараланды.
Сондай-ақ ата-аналардың балаларымен бірге белгілі бір уақыт ішінде ұлттық ою-өрнектермен көмкерілген сән үлгілерін ойлап табуға тырысуы, пісірген ұлттық тағамдардан өзара бақ сынасуы, сахналық қойылымдары сабақ барысын қыздыра түсті. Айта кетерлік жайт – ұлттық мақал-мәтелдер мен халқымыздың аңыз-әңгімелеріне қатысты байқау барысында жас ұрпақтың орыстілді ата-аналарын алға сүйрелеп, мақал-мәтелдердің мәнін ұқтыруға тырысып, тіл сайыстарында үлкендерді өрге сүйрегенін көріп қуанып қалдық. Өткенмен салыстырғанда келешегіміздің қазақылыққа бет бұра бастағанын аңғарғандай болдық. Сондай-ақ бүгінгі күні мектеп, ұстаз, ата-ананың баланы бірге тәрбиелеуге күш салып, тәрбие сағаттарын жұмылып бірге өткізуге ниет танытуы ұрпақ тәрбиесін шыңдай түсетініне көз жеткізгендей болды.
Динар ҮРМЕТҚЫЗЫ, сынып жетекшісі:
– Білім мен тәрбие егіз. Жас ұрпаққа білім беріп қана қоймай, ұдайы ұлттық тәлім-тәрбиені бойына қатар сіңіріп отыру қажет. Біз сонда ғана заманауи білім нәрі мен ұлттық құндылықтарды бойына қатар сіңірген ұрпақ тәрбиелей аламыз. Тәрбие сағаттарының да басты мақсаты – осы. Бойынан қазақылықтың иісі аңқыған оқушыларымның қазақ тіліне қатысты сайыстарда ата-аналарының да алдына түсіп жатуы біздің ұрпағымызбен бірге тіліміздің де ертеңінің жарқын екеніне сендіреді.
