Тараз Таластың түбіне кетпесін
Жамбыл облысы – еліміздегі суқоймалары көп аймақтардың бірі. Егер алдын алмаса, Алматы облысында орын алған оқыс оқиғалар осы өңірде де қайталануы әбден мүмкін.
Айта кетейік, осыдан біраз күн бұрын Тараз қаласына қарасты Талас өзені арнасынан тасып, өзеннің жағалауына қоныс тепкен елді мекендерді су шайып кеткен болатын. Ал одан кейін шелектеп төккен жауын-шашынның әсерінен су жер бетіне шығып, қаланың ықшамаудандарын су басып қалған. Дегенмен егер Жамбыл облысындағы бөгеттер жарылар болса, жоғарыда аталған қауіптер түк болмай қалары сөзсіз. Кейбір мәліметтерге қарағанда, егер Қырғызстан жерінде орналасқан Киров суқоймасының плотинасы жарылатын болса, Тараз қаласы шамамен 11 метр су астында қалуы мүмкін.
Жамбылбек Шахабаев, Жамбыл облыстық төтенше жағдайлар департаментінің бастығы:
– Жалпы, Жамбыл облысында ірілі-ұсақты 111 суқойма бар. Бірден айта кетейік, олардың ішінде 12-сі – қауіп алдында тұрған суқоймалар. Дегенмен тұрғындарға аса қауіп төніп тұрған жоқ. Бұл суқоймалардың барлығын жіті бақылап, назарымызда ұстап отырмыз. Рас, жауын-шашынның әсерінен біреулердің ауласы суға толып, біреулердің жертөлелері жарамсыз болып қалып жатқан шығар. Бірақ біз өз тарапымыздан қолдан келгеннің барлығын жасап отырмыз.
