Сиыры – үшем, қойы төртем туған күн

Жуырда Батыс Қазақстан облысының Қаратөбе ауданын­да бір қой бірден – төрт қозы, Қазталов ауданында бір сиыр қатарынан үш бұзау туды. Қаратөбе ауданының тұрғыны Ғизат Баянғалиев қора толы төрт түлігіне бейжай қарамайды. Уақытылы шөбін салып, жемін жемдеп, қауға алып суарып, ірілі-ұсақты жұмысты күні бойы өзі атқара береді. Сабақтан бос уақытта ұлы Бекзаттың тигізер қолғабысы тағы бар.
Өткен сенбіде Ғизекеңнің бір қойы бірден төрт қозылы болды.
– Қозылардың жүрісі ширақ. Екі қозы­ның түсі – қара, қалған екеуі қоңыр түсті. Енесінің емізуі де қалыпты. Бірақ қозыларға бір мезгіл сиырдың сүтін беремін, –дейді мал иесі.
 «Мал өсірсең, қой өсір, өнімі оның көл-көсір» деген – осы.
Ал Қазталов ауданы Қошанкөл ауылы­ның тұрғыны Марат Бегалиевтің сегіз жасар сиыры бірден үш бұзау туып, айды аспанға шығарды. Былайша айтқанда, бұл «мөңіреме» «үш жылдық жоспарды» бір жылда орындады.
Ауыл әкімі Аязби Шамұратовтың ай­туынша, сиыр қолдан ұрықтандырудан (қазақтың ақбас сиыр тұқымы) өткен. Ұрық­тандырушы техник маман  Есен Жұ­маев­тың есеп кітабына жазылған. Әр бұзау­дың салмағы 20 келіден тартады. Дүниеге келген бұзаулар ширақтық көр­сетуде.
Халқымызда сиыр малы егіз тапса, оған көп қуана қоймай, жаман ырымға ба­лап, сыңарын басқа адамға беріп жібере­тінін естуші едік. Ал сиырдың үшем табуын қандай ырымға жатқызуға бола­ды.