Семей қаласына 2 мыңнан астам «Сергек» камерасы орнатылады, деп хабарлайды ҚазАқпарат тілшісі.
Қала әкімінің орынбасары Дархан Жөргекбаевтың айтуынша, «Сергек» фото-бейнетіркеу жүйесін енгізу мақсатында 5,2 млрд теңге бөлінген.
«40 жол қиылысында және 74 желілік учаскеде 1 391 камера, әлеуметтік нысандарда, көпқабатты тұрғын үй ауласында, адам көп жиналатын жерлерде 687 камера орнатылмақ. Бұндағы мақсат – жолдағы қауіпсіздікті қамтамасыз ету, жол апаттарының алдын алу. Биыл қаланың 27 көшесі орташа жөнделді. Ал 106 көше мен жергілікті маңызы бар жолдар ағымдағы жөндеуден өтті», - деді ол қалалық Ақпарат орталығында өткен баспасөз конференциясында.
Дархан Жөргекбаевтың сөзінше, республикалық бюджет есебінен «Семей-Қайнар» тасжолының 53 шақырымы жөнделуде. Жалпы жыл сайын жол жөндеу жұмыстарына 3 млрд теңге бөлу жоспарланып отыр.