Раушан гүлдер мен қызанақ қатар өседі

Қарағандыда өткен жылдан бері жылыжайда қияр өсірумен шұғылданып келе жатқан Green Technology фирмасы жақын болашақта қызанақ пен раушан гүлдерін өсірмекші. Бұл үшін аталмыш компания жылыжай кешенінің екінші кезекті құрамы­ның құрылысын биыл бастап та кетпекші.
Қыс айларында келісінің бағасы 1000 теңгеге дейін көтеріліп кететін қияр Қара­ғанды нарығында қазір 500-600 теңгеге саудаланып жатыр. Green Technology әлеу­меттік сауда нүктелеріне жылыжайда өскен өнімін, тіпті 350 теңгеден де қойып отыр. «Майқұдық» қияры деген атпен ай­мақ­қа танымал болған көкөніс көпшілік­тің кө­ңілінен шығып отырған жайы бар.
Естеріңізге сала кетелік, өткен жылғы шілденің басында Елбасы қатысуымен өткен телекөпірде ресми тұсауы кесілген жоба бойынша жұмыс істеп келе жатқан компания өңірдің дамуына айтарлықтай үлес қосады деп күтілуде. Қарағанды облы­сы әкімдігі мен «ҚазАгроФинанс» ұлттық холдингі арасында болған келісім бойынша салынған аталмыш жылыжайдың жылдық қуаты 1 695 тонна көкөніс өндіру деп бел­гі­ленген болатын. Аумағы 3 гектар жерді қамтып жатқан жылыжайды салу үшін 1,3 миллиард теңге қаржы жұмсалған. Жылы­жай құрылғылары үшін «Қаз­АгроФинанс» лизингтік несиемен 918,1 миллион теңге қаражат қарастырған еді. Бұйыртса, биылғы жылы салынатын кешеннің тағы бір кезегіне қияр, қызанақ, гүл өсіретін жылыжайлар мен 20 мың тон­на көкөніс сақтауға мүм­кіндік беретін сақ­тау орыны және басқа да ғимараттар енгізіледі деп күтілуде. Жоба үш кезеңге бөліне отырып, жүзеге асы­рылмақ. Жалпы құны 10 миллиард теңгеге жуық құрылыс­тың аяқталу кезеңі 2014 жылы деп белгі­ленген екен. Жаңа жылы­жайдың жылдық өнім қуаты 4000 тонна қияр, 5000 тонна қызанақ және 9 миллион дана раушан гүл өндіруге мүмкіндік береді-міс.
Арқаға алты ай қыс келгеннен-ақ ас­пан­­­дап кететін қияр бағасын «ауыз­дық­таған» Green Technology енді қызанақты да қымбатшылықтан құтқарып, миллион­даған раушан гүлмен өңірімізді көмкеретін түрі бар. Ендеше, Ресей эстрадасының пат­шайымы А.Пугачева шырқаған әннің көр­кем келбетін Қарағандыдан көре алатын шығармыз...