Қазақстан Қарулы Күштерінің әскери қыз-келіншектері үшін генералдар, ҚР Қорғаныс министрінің орынбасарлары керемет концерт ұйымдастырды. ҚР Қорғаныс министрлігінің жоғары басшылық құрамы халықаралық 8 наурыз әйелдер күнімен әйел әскери қызметшілерді құттықтауға айрықша көңіл бөлді.
«21 ғасырда әйел әскери қызметші немесе сарбаз әйел деген кәсіптің болуы ешкімді таңғалдырмайды. Елбасы – Жоғары Бас Қолбасшының сөзімен айтсақ, «бүгінде ер-азаматтар сияқты әйелдер де погон тағуға тең құқылы». Олардың барлығы жоғары білімді, шығармашылық және қоғамдық өмір салтын белсенді ұстанатын қалыптасқан тұлғалар», - деп ҚР Қорғаныс министрі Иманғали Тасмағамбетов әскери қыз-келіншектерге жылы лебізін білдірді.
Мерекелік концерт әйел әскери қызметшілерді шаттыққа бөлеп, көңілін бір көтеріп тастады. Бірде-бір көрермен бұл мерекеде назардан тыс қалмады. Оларға гүл шоқтары тарту етіліп, аяулы аруларға арнап арнайы шығарылған ән орындалды, ал жасұландықтар қыз-келіншектерді биге шақырды.
Алайда, бүгінгі концерттің ең басты тосынсыйы ҚР Қорғаныс министрі орынбасарларының көрсеткен ерекше өнерлері болды. Генерал-лейтенант Оқас Сапаров пен Нұрлан Сауранбаевтың орындауындағы лирикалық әндер, генерал-майор Талғат Мұхтаровтың айрықша бейнеге енуі және «Сонымен бізге керегі тоғыз жүз гүл, ал бір гүл – алты жүз» деген ән жолдарымен Берік Шолпанқұловтың бюджетті музыкалық есептеуі барлық залды тәнті етті. -Банкет, су мен жарықтың есебін қосайық. Осымен барлығы ескерілген сияқты» - деп Қорғаныс министрінің қаржы мәселелері жөніндегі орынбасары өз әнін аяқтады.
Барлық орындаушылар, әртістер мен бишілер мереке иелеріне ерекше көңіл-күй сыйлады.