Қостанай облысы: Аманқарағай орманында 158 түрлі құс мекендеген
Оның 16-сы Қазақстанның Қызыл кітабына енгізілген.
Қызыл жалын шарпыған орманда өсімдік пен жануарларға да аса үлкен залал келді. Популяцияның қайта көбеюіне ұзақ уақыт қажет, деп жазады Qazaqstan ұлттық арнасы.
Биоалуандылықты сақтау қауымдастығы өрттің салдарына алаңдаулы. Қауымдастық қызметкері Алексей Тимошенко Аманқарағайдағы өрттің шығыстан батысқа қарай 65 шақырымға жеткенін айтады. Маманның дерегіне сүйенсек, бұл орманда көктерек, қайың, қарағай өскен. Сонымен бірге 158 түрлі құс мекендеген. Оның 16-сы Қазақстанның Қызыл кітабына енгізілген.
Жануарлардың мекенге қайта келіп, құстардың ұя салуы үшін орман қалпына келуі керек. Бұл аз уақыт емес. Ағаштар қайта өсуі керек. Ең бастысы, құстардың ұя салу кезеңі өрт болмай тұрып аяқталған. Сондықтан көбісі ұшып үлгерді деп ойлаймын. Алайда кеміргіштер, осыған ұқсас жануарлар түтінге тұншығып, орманда қалып қоюы мүмкін, -деді Қазақстан биоалуандылықты сақтау қауымдастығының қызметкері Алексей Тимошенко.
