Мамырдың 3-4-і күндері Қазақстан Республикасы Қарулы Күштерінің Бас қолбасшысы Нұрсұлтан Әбішұлы Назарбаев жұмыс сапарымен Қарағанды облысына келіп қайтты. Ресми сапардың алғашқы күні лауазымды қонақтар Қарағанды іргесіндегі Көкөзек қолатындағы әскери гарнизонда болды. ҚР қорғаныс министрі Әділбек Жақсыбеков Мемлекет басшысын әскери гарнизон құрамының жауынгерлік әзірлігімен және ішкі құрылымымен таныстырды. Бас қолбасшы №50185 әскери бөлімнің жауынгерлік кезекшілікте тұрған авиациялық техникасын, техникалық зертханасын аралады, сондай-ақ ел Президентіне МиГ-31 ұшағының жұмыс регламенті мен осы ұшақтың кешенді-тренажері көрсетілді. Елбасы Қазақстан әскерінің жұмылдыру резервін дайындау шараларымен де ішінара танысты. Бұрынғы «Спасск» зауыты жұртында өткізілген оқу-жаттығу шаралары барысында Бас қолбасшыға жауынгерлердің оқу кластары мен оқу-материалдық базасы көрсетілді.
Мемлекет басшысы жұмыс сапары барысында облыс орталығындағы Шоқан Уәлиханов атындағы Кадет корпусының түлектерімен жүздесті.
Сонымен бірге, содырлар шабуылының алдын алуға қатысты арнайы тактикалық жаттығулар да өткізілді. Әскерлердің тактикалық қимылдары барысында взводтың блок-бекетке шоғырлануы, десант түсіру, резервтегі бөлімшелердің шабуылы пысықталды. Елбасы әскерилерге Отан қорғаушылары күні қарсаңында ертеңгі күнге деген нық сенім керектігін баса айтты. Мемлекет басшысы ел тыныштығы күзетіндегі азаматтарға әскери ант пен борыштарына адалдықтары үшін алғыс сезімін жеткізді, өз қызметтерін үлгілі атқарған үш әскери қызметкерге өз қолтаңбасымен алтын сағат сыйлады.
Нұрсұлтан НАЗАРБАЕВ, Қазақстан Республикасы Қарулы Күштерінің Бас қолбасшысы:
– Біздің жеріміз аса үлкен болғанымен, бізге саны соншама көп әскер керек емес. Бізге жоғары дайындықты, білімді, қаруланған әскер керек. Қазіргі таңда біздің қарулы күшіміз осал емес. Офицерлердің қатары нығайып, молайып келеді. Жастардың әскери қызметке қызығуы мені қуантады. Қазір Қазақстанда әскери қызмет беделі жоғары. Бізде әлем елдерінде бар барша әскери бөлімдер бар. Патриоттық рух тәрбиесінде алға басушылық мені қуантады.
Елбасы сапарының екінші күнгі жұмыс бағдарламасымен ат басын тіреген басты нысаны Облыстық қан орталығы болды. Облыстық денсаулық сақтау басқармасының бастығы Ерденбай Әбілқасымов дәрігерлер қауымы атынан Елбасыға денсаулық сақтау саласына деген қамқорлығы үшін алғысын білдірді. «Аймақта медициналық мекемелердің желісі дамып келеді, олардың материалдық-техникалық базасы нығайтылып, медициналық практикаға диагностика мен емдеудің жаңа технологиялары енгізілу үстінде. Осының бәрі тұрғындардың денсаулығын жақсартуға мүмкіндік берді. «Сіз бекіткен «Саламатты Қазақстан» бағдарламасында белгіленген мақсаттарға жету жолында алға ілгерілей беретін боламыз», – деді ол ел Президентіне.
Қан орталығының директоры Владимир Лактионов Мемлекет басшысына осы медициналық мекеменің жұмысы туралы айтып берді. Нұрсұлтан Әбішұлы донорларды іріктеудің алғашқы кезеңі болып табылатын ақпараттық тіркеу жүйесімен танысты. Қан дайындау бөлімшесін, плазмоферез бен плазмоцитоферез залдарын, сондай-ақ қан тоқтатуға және жара орнының тез бітуіне арналған фибрин желімі әзірленетін зертхананы көріп шықты.
Бұл орталықтың құрылысы Қарағанды облысының емдеу-профилактикалық мекемелерін донорлық қан компоненттері мен препараттарымен қамтамасыз ету, сондай-ақ донорлық қанның жасушалы элементтерін және қан алмастырғыш қорын сақтау қажеттілігінен туындаған болатын.
Орталықтың ерекшелігі қазіргі заманғы халықаралық талаптарға сай келетін жоғары технологиялық диагностикалық құралы, сондай-ақ қан мен оның компоненттерін сақтайтын терможабдығы, қан арқылы берілетін инфекцияны анықтайтын жүйе тестісі бар бірегей кешен екендігінде жатыр.
Қанды жинақтаудан бастап дайын өнім шығарып, оның деректерін орталықтың бірыңғай ақпараттық жүйесіне бергенге дейінгі барлық кезеңдер тұрақты автоматтандырылған бақылауда ұсталады. Бұл талапқа сай келмейтін өнімді қолданудың алдын алады. Сонымен қатар, дайындау үдерісі адамның қатысуынсыз жүзеге асырылады. Орталықта донорларды қабылдау үшін қолайлы жағдайлар жасалған.
Қан орталығының жұмысымен танысқан соң Мемлекет басшысы оның қызметкерлерін осынау аса маңызды медициналық мекеменің ашылуымен құттықтап, барша облыс тұрғындарының игілігі жолындағы еңбектеріне табыс тіледі.
Ресми қонақтар облыс орталығындағы «Эргономика» ғылыми-өндірістік фирмасында және өзге де әлеуметтік нысандарда болды.
Дерек-дәйек
Облыста Президент Жолдауында қойылған міндеттерді жүзеге асыру бойынша ауқымды жұмыстар жүргізілуде. Үш айдың қорытындысы бойынша 310 млрд теңге сомаға өнім өндірілді, айғақты көлем индексі 107,7 % құрады. Облыс экономикасына 34,9 млрд теңге көлемінде инвестиция салынды немесе 2010 жылдың сәйкес кезеңіне қарағанда 154,5% құрады. Оның 22,6 млрд теңгесі – құрал-жабдықтарға, 11,6 млрд теңгесі құрылыс пен ғимараттардың күрделі жөндеуіне инвестицияланды.