Германияда 1 млн-ға жуық қазақстандық тұрып жатса, Қазақстанда 200 мыңға жуық неміс тұрады. Бұл туралы ҚР Сыртқы істер министрінің орынбасары Роман Василенко мәлім етті, деп хабарлайды ҚазАқпарат тілшісі.
«Қазақстан мен Германия қарым-қатынасы саяси белсенді байланыс және сауда-инвестициялық жобалар арқылы мығым. Сондай-ақ адами өлшемнің маңызды әлеуетімен де ерекшеленеді. Еліміз ХХ ғасырдың басында өлкемізге келе бастаған мыңдаған неміс үшін екінші отанына айналды. Ал Еділ бойындағы немістерді қайғылы сталиндік депортациялағаннан кейін еліміздегі немістердің саны 1 миллионға дейін өсті. Біз әрқашан Қазақстанның біртұтас халқының ажырамас бөлігіне айналған неміс отандастарымыздың еңбексүйгіштігі мен тату көршілігіне зор құрметпен қараймыз. Бүгінде Германияда 1 млн-ға жуық қазақстандық тұрып жатыр. Оның ішінде біздің елде тұрып, кейін тарихи отанына көшкендер де бар. Ал бізге келсек, Қазақстанда 200 мыңға жуық неміс халқы өмір сүріп жатыр», - деді Р. Василенко.
Вице-министрдің мәлімдеуінше, ішкі экономиканы ілгерілетуде Германия өз үлгісімен ерекшеленеді.
«Өткен жылдың қыркүйек айында Нұр-Сұлтанда қазақ-герман орталығы ашылды. Ондағы мақсат - Қазақстандағы неміс этносын шоғырландыру және жан-жақты қолдау. Сондай-ақ Қазақстан мен ГФР арасындағы мәдени-гуманитарлық ынтымақтастықты одан әрі дамыта түсу. Қорытындылай келе, сенім мен өзара түсіністікке негізделген жемісті ынтымақтастық үшін неміс достарымызға, әріптестерімізге және серіктестерімізге ризашылығымды білдіремін. Және дипломатиялық қарым-қатынастың 30 жылдығымен тағы да құттықтаймын!», - деді ол.