Қазақ ғалымын әлем таныды

Қазақ ғалымы физиология ғылымының лимфология са­ла­сы бойынша Еуропаның жо­ғар­ы оқу орындарында дәріс оқитын бо­лады. Академик Е.А.Бөкетов атындағы Қа­ра­ғанды мемлекеттік университетінің «Бе­йім­делу физиологиясы» зертхана­сы­ның мең­ге­ру­шісі, биология ғылымының докторы Нұркен Мыр­заханұлының еңбектерін батыс ғылымы жа­ңалық деп бағалады. Жуырда қазақ ғалы­мы әйгілі Вена университетінің құрметті профес­со­ры атанды.
Еуропа Нұркен Мырзаханұлының ғылымға қосқан үш жаңалығын айырықша бағалап отыр. Олар – ағ­за­дағы сөл алмасудың реттелуі туралы, лимфа түйін­де­рі­нің жиырылу қасиеті жайлы және білім туралы білім – эдукологияға қатысты зерттеулер. Ғалым 2006 жылы Ха­лықаралық «Кәсібім – өмірім» сыйлығын «Медицина жә­не биология саласын дамытудағы айрықша еңбегі үшін» аталымы бойынша жеңіп алған еді. Көп ұзамай Мыр­заханұлы еңбектерін әлем танып, Оксфорд уни­вер­ситеті ғылыми кеңесінің шешімімен оған Халық­ара­лық Сократ сыйлығы да берілді. Енді, міне, Еуропа­да­ғы ең көне әрі ең беделді жоғары оқу орындарының бірі – Вена университеті қарағандылық ғалымға құр­метті профессор атағын беріп отыр. Бұл мәртебе био­лог­тың батыстың жоғары оқу орындарында дәріс оқуына жол ашады.
Нұркен МЫРЗАХАНҰЛЫ, биология ғылымының докторы, профессор:
– Еуропалық ғалымдар менің лимфологиядағы сөл тамырларына қатысты зерттеулеріме қызығушылық танытып отыр. Адам ағзасында қан айналымы сияқты сөл тамырларының да жүйесі болады. Мен сөл тамыр­ла­ры және сөл тасымалдау жүйесіне қатысты арнайы тұ­ғырнама түздім. Оның тобықтай түйіні мынау: қор­ша­ған ортаның бүлінуімен бірге біздің ағзамыз түрлі лас заттарға толады, осы заттар сөл тамырларының жұ­мысына кедергі келтіреді. Ал ағза жас кезінде бұл жү­йе үнемі тазартылып отыруы керек. Мен өз еңбегімде осы­ны қажет жағдайда қалай реттеуге болатынын жә­не оны қолданудың қандай ауруларды емдеуде пай­дасы бар екенін анықтадым. Сөл тамырларын тазарту ар­қылы емдеу тәсілі Ресейде қолданысқа енген. Жалпы, бұл – қызықты әрі күрделі тақырып.