Қан тапсырсаңыз, Қазақстан аруы бетіңізден сүйеді

Елімізде «Сенің күнің, донор!» атты республикалық акция басталды. Аққан ауруына шалдыққан 80 бүлдіршінге мың литр қан керек. Алғашқы болып депутаттар қан тапсырды.
Үшінші рет ұйымдастырылып отырған республикалық акция биыл Алматы қала­сынан басталды. Мамыр айының 10-ынан маусымның 10-ына дейін жалғасатын ша­раның басты мақсаты – мың литр қан жи­нау. «Бауыржан» қайырымдылық қоры же­текшілерінің айтуынша, осыдан 20 жыл бұрын Қазақстанда 750 мың донор болған. Ал қазіргі таңда бар-жоғы 250 мыңнан аспайды. Сол үшін донорлық қанға мұқтаж жандардың саны өте көп. Акцияның оң нәтижелі болуына атсалысып, қан тап­сы­рушылардың көшін Парламент және Мәс­лихат депутаттары бастады. Қан тап­сыру процедурасының ауырт­палықсыз әрі пай­далы екенін айтқан сая­саткерлер баршаға үлгі болды.
Болат Әбілов, саясаткер:
– Бүкіл халықты қайырымды іске ша­қырамын. Дені сау кез келген азаматтың қолынан келеді. Донор болу – денсаулыққа пайдалы әрі жас балдырғанға өмір сыйлау. Өзге елдерде мұндай шаралар жақсы да­мы­ған. Біздің елде де жоғары дәрежеде дамыту – өз қолымызда. Өз басым екі жыл­да бір рет міндетті түрде қан тапсырып тұрамын.
Досым Сәтпаев, саясаттанушы:
– Мен ешқашан мұндай қайырым­дылықтан бас тартпаймын. Денсаулығым­ның мүмкіншілігі болса, әрдайым қан бе­руге даярмын. Осы күнге дейін кем дегенде сегіз рет қан тапсырдым.
Келесі кезек – эстрада жұлдыздарында. Қайырымдылық шараның қаржылай демеушісі – Beeline компаниясының қыз­мет­керлері де қан тапсырмақ. Мамырдың 23-інде 2012 жылғы Қазақстан аруы да акцияға қатысып, сол күні қан тапсы­ратын­дардың бетінен сүймекші екен. Бұл күні әрбір донор маусымның 14-і болатын га­ла-концертке шақыру билеттерін алады. Концертке Сәкен Майғазиев, Мейрамбек Беспаев және қазақ эстра­дасының тағы да басқа жұлдыздары қатысады. «Донор болу – қайырымдылық. Біреуге өмір, біреуге үміт отын сыйлау. Республиканың сегіз ірі қаласында өткізілмек шараның ауқымы келесі жылы бүкіл елді қамтитын болады»,– дейді «Бауыржан» қайырымдылық қоры­ның директоры Жұлдыз Омарбекова. Қан тапсырамын деушілерге Алматы қала­сындағы Республикалық қан орта­лығының есігі сағат 17.00-ге дейін ашық.