Қайырымдылық қорлары қара тізімге ілігеді

Қазақстанның қайырым­ды­лық қорлары жұмысының есе­бін топтастыратын интернет ре­сурс пайда болды. Жұмыс нәтижелерін жұртқа паш еткен ұйымдар «Мен адалмын» төсбелгілеріне ие болды. Қоғам­ға адал қызмет етіп жүрген бірнеше қор көлемді қаржы­лай көмекке қол жеткізе алады.
Қазақстанда үшінші рет «Қазақстандағы қайырымдылық» атты халықаралық ғылы­ми-тәжірибелік конференция өтті. «Бауыржан» және «Алтын қыран» қайырым­ды­лық қорлары ұйымдастырған жиынның биылғы тақырыбы – «Қазақстанның қайы­рым­дылық қорларының тиімділігі мен ашық­тығы». ҚР Статистика агенттігінің мә­лі­меттері бойынша, елімізде 9092 үкі­мет­тік емес ұйым бар. Олардың 2067-сі Ал­маты қаласында орталықтандырылған. Тір­келген ұйымдардың негізгі міндеттері – қоғамдық маңызы бар жұмыстарды ат­қа­ру. Ал филантропия саласындағы мәсе­лелерді талқылап, шешімін табатын пікірталас алаңы әзірше елімізде жалғыз, ол – жыл сайын өтетін осы конференция. Бұл жол­ғы басқосу жылдағыдан біршама өз­геше болды. «Бауыржан» қайырымдылық қорының директоры Жұлдыз Омарбеко­ва­ның айтуынша, коммерциялық немесе қо­ғамдық қор болып тіркелетіндер саны күн санап өсуде. Бірақ жартысынан көбінің қоғамға пайдасы жоқ. Қаржының қай­дан келіп, қайда кеткені жайлы есеп те бе­ріл­мейді. Үкіметтік емес ұйымдардың ашық­тығы мен адалдығын айшықтау мақ­сатын­да жаңа ғаламтор парағы ашылды. Биылғы басқосудағы басты өзге­шелік пен жаңалық та – осы. Енді тіркеуде тұрған ұй­ым­дар жұмыс нәтижелері мен есептерін ғаламтор бетіне жария ете алады. Есеп беруден бас тартқандар қара тізімге ілігеді. Жиын барысында есебін ұсынғандарға «Мен адал­мын» төсбелгілері табыс етілді. Ал «Ал­тын қыран» халықара­лық қайырым­ды­лық қорының басшысы Исламбек Сал­жанов адал еңбегі мен жұ­мы­сының нәти­жесін ашық көрсетіп, дәлел­деген қорларға қаржылай көмек көрсетуге сөз берді. Кон­фе­ренцияға арнайы шақы­рылған Ресей мен Ұлыбритания қоғамдық қор­ларының жетекшілері өз тәжірибеле­рімен бөлісіп, салыстырмалы талдаулар жасады.