Алматы облысының бас мемлекеттік санитарлық дәрігері Ерғали Сыдыманов ораза ұстаушыларға бірқатар кеңес айтты, деп хабарлайды Stan.kz ақпарат агенттігі.
Маманның сөзінше, диетологтардың кеңесін ескере отырып, ағзадағы суды толтыру үшін кем дегенде 1-1,5 литр су ішу, тұзды тағамдардан бас тарту, сонымен бірге көкөністерді көбірек жеу керек.
Сыдыманов ауызашарда майлы тағамдарды шамадан тыс жеу ағзадағы зат алмасуды бұзуы мүмкін екенін баса айтты. Жеңіл диета кезінде жемістер мен жидектерді көбірек жеу пайдалы, дейді ол.
"Осы ережелер иммундық жүйеңізді сақтауға көмектеседі, ал күшті иммундық жүйе кез келген вирустық инфекцияларды жұқтыру қаупін азайтады. Қарапайым сақтық шараларын есте сақтау маңызды. Консервіленген өнімдерді, белгісіз жерлерде сатылатын дайын және жартылай дайын тағамдарды, мысалы, мерзімі, орны, құрамы көрсетілмеген консервілерді тұтынудан аулақ болыңыз", - деп атап өтті бас дәрігер.