Күн құбылғанымен, мерекелік көңіл күй бұзылмайды

Мереке және демалыс күндері Астанада күн суытады. Жаңбыр жауып, жел күшейеді. Белсенді циклон мен атмосфералық таралымдардың ықпалынан еліміздің басқа да аймақтарында күн райы бұзылады.
«Қазгидромет» кәсіпорны мамандары­ның мәліметінше, бүгін Астанада күн жаң­бырлы болады. Солтүстік-шығыстан 9-14 м/с жел соғады, кей жерлерде жел екпіні 25 м/с-ке жетеді. Күндізгі ауа температу­расы 12-17 градус жылыға дейін төмен­дейді. ҚР Төтенше жағдайлар министрлігі тұрғындарға күн райынан сақтану жөнінде ескерту беріп отыр. Бүгін және алдағы тәуліктерде Қазақстанның көп бөлігінде жаңбыр жауып, дауыл тұрады. Солтүстік аймақтарда күн салқындайды. Алматыда және Алматы облысында да өткінші жаңбыр жауып, жел соғады. Дегенмен об­лыс аумағында ауаның орташа температу­расы 28-30 градус ыстық шамасында болады. Еске салайық, бүгін және ертең Астананың үш алаңында – «Бәйтерек» мо­нументі жанында, Орталық алаңда және Студенттер саябағында сағат 21.00-ге де­йін Конституция күніне арналған мере­ке­лік шаралар өтеді. Алматыда мерекені той­лаудың уақыты өзгерді, мәдени шара­лар бүгін сағат 20.00 – 22.00 аралығында өтеді.