Көктайғақтан сақтаныңыз!
Кеше Семейде 1-ден 9-сыныпқа дейінгі оқушылар үшін сабақ кейінге қалдырылды. Бұған көше-жолдардың көктайғақтануы себеп болды.
Семей қалалық төтенше жағдайлар жөніндегі басқарма мамандарының хабарлауынша, мұның алдында өңірде қар аралас жаңбыр жауған болатын. Ауа температурасының 0-ге дейін төмендеп, кейін бірден 5 градусқа көтерілуі салдарынан көктайғақ қалыптасты. Аяқ алып жүргісіз тайғақта сүрініп, жарақаттанған 100-ге жуық адам дәрігерлерге көрінген. Олардың 25-інің сүйегі сынған екен. Тұрғындарды табиғаттың тосын мінезінен сақтау үшін төтенше жағдайларға жауапты мамандар оқу процесін уақытша тоқтату туралы шешім шығарды.
Марат Дәулетин, Семей қалалық Төтенше жағдайлар жөніндегі басқарманың алдын ала сақтандыру бөлімінің бастығы:
– Қала көшелерінде әлі күнге дейін көктайғақ. Қала сыртына шығатын жолдар жабылды. Жол полициясы хабарлағандай, қала ішіндегі көшелерде көліктердің жылдамдығы сағатына 20-30 км-ден аспай тұр. Сол себепті қала тұрғындарынан абай болуды сұраймыз. «Сақтансаң сақтайды» дегендей.
Мұндай жайсыз ауа райының Семейде ғана емес, еліміздің басқа да аймақтарында қалыптасқаны белгілі. Мамандар енді Астана мен Алматы қалаларының көше-жолдарында көктайғақ пайда болатынын ескертіп отыр. Қар аралас жаңбырдың соңы секундына 14 метрге дейін жететін желге ұласады. Күндізгі 11 градустық жылымық күрт құбылып, 4 градусқа дейін қайта суытпақ. Синоптиктердің болжамы бойынша, еліміздің екі бас қаласында көктайғаққа қоса, көз байлайтын қалың тұман да түсуі мүмкін.
