Көктайғақ төтенше оқиғаларды көбейтіп жіберді
Алматы өңірінде көктайғақтың кесірінен жол-көлік оқиғалары жиілеп кетті. Көшеде тайып құлап, аяқ-қолын сындырған жаяулардың қатары да артып отыр. Тек бір тәуліктің өзінде Алматыда 100-ге тарта адам дәрігерлер көмегіне жүгінген. Мамандар қала көшелерінде аса сақ жүруге кеңес беріп отыр.
Алматыда соңғы жауған қардың арты көктайғаққа ұласып отыр. Оның үстіне, жаяу жүргіншілерге арналған жолдар қардан толық тазартылмаған соң, айнала ойдым-ойдым көк мұзға айналып, тұрғындардың жүріп-тұруын қиындатып жіберді. Тайып құлап, аяқ-қолын сындырғандардың және басқа да жарақат алып қалғандардың саны күрт көбейіп кетті. Мамандардың айтуынша, аяқ алып жүргізбес көктайғақ әсіресе қарияларды баудай түсіріп жатыр.
Жұмахан МОЛДАҚҰЛОВ, Алматы қалалық №4 клиникалық аурухана бас дәрігерінің орынбасары:
– Көктайғақтың кесірінен ауруханаға түсіп жатқандар саны көбейіп кетті. Аяқ-қолдарын сындырып, тайып құлау салдарынан тіпті басын жарақаттап алғандар басым. Сондықтан мен тұрғындарға қала көшелерінде байқап жүруге кеңес беремін. Ал жергілікті коммуналдық шаруашылық қызметкерлері жаяу жүргіншілерге арналған жолдарға тұз, құм сепсе, жақсы-ақ болар еді.
Алматы облыстық төтенше жағдайлар департаментінің қызметкерлері де тұрғындарға мейлінше сақ болуды ескертіп отыр. Өйткені көктайғақ әзірше кете қоймайды. Ең өкініштісі, көктайғақ облыс аумағында кісі өліміне соқтырған жол апаттарын көбейтіп жіберді.
Жайдарлы ҚҰДАЙБЕРГЕНОВ, Алматы облыстық төтенше жағдайлар департаментінің жедел кезекшісі:
– Соңғы бір аптаның ішінде Алматы облысында 18 жол-көлік оқиғасы тіркелді. Оның ішінде тоғыз адам қаза болып, 23-і түрлі жарақаттармен ауруханаға түсті. Ауа райының қолайсыздығына байланысты көлік жүргізушілеріне жолда жүргенде абай болуды ескертеміз. Сонымен қатар тұрғындар да келеңсіз жағдайларға тап болмас үшін табаны кедір-бұдыр, резеңке немесе жұмсақ аяқкиімдер киюі қажет. Ал пластик, былғары табанды етіктер тайғанақ келеді. Сондықтан ондай етіктердің табанына жабысқақ пластырь жапсырған абзал.
