Кереку орманы енді өртенбейді

Павлодар облысындағы ор­ман­ды алқаптар «Ертіс орма­ны» мемлекеттік орман таби­ғи резерваты мен Баянауыл ұлт­тық табиғи паркінің аума­ғын­да ор­наласқан. Ондағы тіл­сіз жау­дың алдын алу мақса­тындағы іс-шаралар биыл сәуірдің 10-ында басталмақ.
Павлодар облыстық төтенше жағдай­лар жөніндегі департаменттің бастығы Мыл­тық­бай Айтжановтың айтуынша, был­тыр өңірдің бес орман шаруашылығы аума­ғын­да 101 өрт болған. Тіл­сіз жау­дың салдарынан 3 миллион тең­геге жуық шығын келтірілген.
«Ертіс орманы» мемлекеттік орман та­би­ғи резерватында бүгінгі таңда 12 өрт-­хи­миялық стансысы, жеті өрт сөндіру көлі­гі, 35 трактор мен 10 кіші өртсөндіргіш ке­шен қолданысқа дайын. Және өрттің шы­ғуын бақылауға алатын тоғыз бекет жұмыс істейді. Биыл тағы екі өрт-химиялық стан­сысы қолданысқа беріледі. Ал Баянауыл мем­лекеттік ұлттық табиғи паркінің тех­ни­ка­лық-материалдық базасы да өрт қауіп­сіздігі кезеңіне толық дайын. Айта кетер­лігі, ұлттық парк аумағын әуеден бақы­лау­ға ҚР Ауыл шаруашылығы министрлігі тара­пынан тікұшақ бөлінген.
Қазбек АХМЕТОВ, «Ертіс орманы» мемлекеттік орман табиғи резерватының директоры:
– Қазіргі кезде өрт қауіпсіздігі ке­зеңі­не дайындық жұмыстарына бай­ла­нысты туындаған мәселелер жоқ. Таби­ғи резерват құрамындағы қызмет­кер­лер саны 256-дан 322 маманға арт­ты. Жасыл желекті алқаптарды өрт­тен сақтау мақсатында жергілікті ор­ман шаруа­шылықтары Алтай өлкесі ор­ман­шы­ларымен тығыз қарым-қаты­нас орнатып, арнайы жұмыс жоспарын бекіт­ті. Қар ерісімен резерват аумағын қо­қыс­тан тазарту мен минералданған жолақ­тарды орнату бойынша жұмыс­тарды бастаймыз.