Елімізде гүл бағасы шарықтады
Әйелдердің халықаралық мерекесі қарсаңында елімізде гүл бағасы қымбаттады. Tengrinews.kz порталының тілшілері республиканың әр аймағындағы гүл саудасына шолу жасады.
Порталдың хабарлауынша, наурыздың 7-сінен 10-ына дейін елордада гүл шоқтары 300-500 теңгеге қымбат болады. Мереке күндері голланд раушанының құны 2000 теңге, лалагүлдің құны 3000 теңгеге дейін көтеріледі. Әдетте лалагүл шоғы 2000-2500 теңгеден сатылатын. Астанада мерекелік гүл шоқтарының төменгі бағасы да осы шамада болмақ. Ал Алматыда гүл сататын орындар бағаны 10-нан 30%-ға дейін көтереді. Кейбір сауда нүктелерінде гүл 500-1000 теңгеге дейін қымбаттауы мүмкін. Флористердің айтуынша, мереке қарсаңында бағаны көтеру – жалпыәлемдік тәжірибе. Алматыда жергілікті гүлдермен бірге, Голландия мен Эквадордан жеткізілген шоқтар сұранысқа ие. Бағаны көбіне гүл жеткізушілер белгілейді. Еліміздің әр аймағындағы гүл саудасына жасалған шолу мереке күндері қыз-келіншектердің ең басты сыйлығының, кем дегенде, шамамен 200-300 теңгеге шарықтайтынын көрсетіп отыр.
