Электронды үкімет жөнінен Орталық Азияда көшбасшымыз

«Электрондық үкімет» порталының іске қосылғанына тура алты жыл толды. Бүгінге дейін порталды пайдаланушылардың саны 154 120-ға жетті. Мұнда күніне 25 мыңға жуық адам кіреді.
ҚР Көлік және коммуникация министрлігі ма­мандарының хабарлауынша, портал өзінің жұмысын 2006 жылғы 12 сәуірде бастады. Оны іске қосқан кезде әртүрлі мемлекеттік ор­гандардың қызметін қамтитын 337 ақ­параттық қызмет жүзеге асырылған бола­тын. Билік пен қоғамды байланыстыратын бұл портал шеңберінде 2000-нан аса ақпараттық, 219 интерактивті және транзакциялық қыз­мет ұсынылыпты. Бұл қызметтерді тәулігіне 25 мыңға жуық адам пайдаланады екен. Е-үкімет жұмыс істеген алты жыл ішінде 11,2 миллионнан аса электрондық қызмет, со­ның ішінде биыл 1,2 миллионнан аса қызмет көр­сетілді. ҚР «электрондық үкі­метінің» соңғы екі жылда қол жеткізген ма­ңызды жетіс­тік­терінің бірі – БҰҰ-ның элек­трондық үкіметті дамыту бойынша биыл жа­саған әлемдік рей­тингісінде ілгерілеуі. Мәселен, 2010 жылмен салыстырғанда Қазақстан бұл рейтингіде 46-дан 38-орынға, яғни сегіз позицияға кө­терілді. Сонымен қатар желіде қызмет көрсету индексі бойынша 10 пози­цияға, те­ле­коммуникация инфра­құры­лымы индексі бойынша 14 позицияға озды. БҰҰ дайын­даған рейтингі ұйымға мүше 190 мемлекеттің мәліметтерін салыстырған болатын. Сонымен қатар электронды қосылу индексі бойынша Қазақстан Сингапурмен бірге екінші орынды иеленді. Бұл көрсеткіш халықтың үкімет мү­шелерімен желіде бай­ланыс жасауы, блогтар мен әлеуметтік же­лілерде ақпарат алмасуы бойынша жасалды. Қазақстан е-үкімет жөні­нен Орталық Азия өңірінде көшбасшы атан­ды. Мемлекет басшысы Нұрсұлтан Назар­баевтың тап­сыр­масы бойынша 2012 жылдың соңында әлеу­меттік маңызды қыз­меттердің 60 пайызы, соның ішінде лицен­зиялардың барлық түрі электрондық түрде берілуі тиіс. Осы тапсырманы орындау аясын­да лицензия­ларды беру қызметі электрондық форматқа көшірілді. Қазіргі мезгілде «элек­трондық үкімет» порталы арқылы 120 мем­лекеттік қызмет көрсетілсе, жылдың соңына қарай электронды сервис түрлерінің саны 143-ке дейін артады.