Екі айда 615 бала өлімі тіркелді: Елімізде нәрестелердің шала туып жатқанына не себеп
Елімізде 2 айда 615 бала өлімі тіркелген. Бұл тек биылғы жылғы көрсеткіш қана. Көш басында Қостанай, Атырау және Солтүстік Қазақстан облыстары тұр екен.
Ақ халаттылар жаңа туған сәбилердің шетінеп кетуіне дұрыс өмір салтын ұстанбайтын аналар кінәлі дейді. Өйткені тым аз салмақпен және де өзге де ауытқумен туылатын сәбилердің саны азаймай отыр. Жағаұстатарлық статистиканың көбейюіне не себеп? Бұл туралы Евразия арнасына сілтеп Stan.kz хабарлайды.
Дені сау ұрпақты дүниеге әкелу әр ананың арманы екені айтпасақ та түсінікті. Бірақ өкініштісі сол, бұл парызды абыроймен атқарып жүрген келіншектер шамалы. Салауатты өмір салтын сақтамайды, дәрігерге уақытылы қаралмайды. Содан болса керек, әлсіз, шала туған сәбилер жыл сайын көбейіп барады дейді мамандар. Олардың сөзінше, тек биылғы алғашқы екі айдың өзінде 600- ден астам шақалақты аман алып қалу мүмкін болмапты.
"2018 жылы 3123 нәресте өлімі тіркелсе, 2019 жылдың екі айында 615 бала өлімі тіркелді. Жыл сайын бала өлімі азаюда. 2018 жылды 2016 мен салыстырсақ 8 пайызға, 2017 жылмен салыстырсақ 31 пайызға азайған", - дейді Ұлтық экономика министрлігінің статистика комитетінің сарапшыы Мағжан Советов.
Мамандардың уәжінше, республика бойынша бала өлімінің жалпы көрсеткіші азайғанымен, бұл сандар әлі де көңіл көншітпейді. Өйткені Атырау, Алматы мен Ақтөбе облыстарында нәрсетелердің шетінеп кетуі әлі де азаяр емес. Оған аналардың денсаулығы мен түрлі сыртқы фактордың әсері етуде.
"Тек айта кететін бір жайт, кей өңірлерде сандар мүлдем өзгермейді. Мәселен Ақтөбе, Атырау мен Алматы облыстарындағы жағдай үшін алаңдауға негіз бар. Бірақ жалпылама қарағанда еліміз бойынша бала өлімі кеміген. Тіпті жыл сайын азайып келеді деп айтуға негіз бар", - дейді медицина ғылымдарының докторы Риза Боранбаева.
Еліміздегі тек бір орталықтың өзінде жыл сайын 350-ге жуық бала ем алады. Олардың 200-ге жуығы шала туған. Ең әлсіз бүлдіршіннің салмағы небәрі 400 граммның ар жақ бер жағы екен. Сондай-ақ, жыл сайын 1000 баланың 18-і о дүниелік болады.
"Шала туған балаларда кездесетін ең үлкен проблемалардың бәрі ол сенсорлық ауытқулары, неврологиялық жүйке жүйесінде ауытқуларының мәселесі үлкен проблема болып саналады. Енді жетіліп туылып, шетінеп кетіп жатқан нәрестерлердің мәселесіне келер болсақ, ол көптеген ақаулар туған балаларда ғана. Өкінішке қарай, ондай балалар Қазақстанда туып жатыр", - дейді педиатрия және балалар хирургиясы ғылыми орталығының нәрестелер реанимациясының меңгерушісі Гүлбану Санызбаева.
Осылайша дәрігерлердің дерегінше, еліміздегі 70 пайызға жуық қыздардың денсаулығында кінәрат бар. Дені асқазан-ішек, жүйке жүйесі, жүрек аурулары мен эндокриндік проблемалармен күресуде екен. Ал, болашақ аналардың денсаулығында кездескен мұндай сырқаттардың құрсақтағы сәбиге де өз әсерін тигізетіні анық. Сондықтан әр бұрымды өз денсаулығына үлкен жауапкершілікпен қарауы керек дейді ақ халатылар.
