Астананың шетін су басып жатыр (ФОТО)

Астананың іргесінде орналасқан елді мекендерді су басып жатыр. Нұра өзені арнасынан шығып, еріген қардың суы Ағанас бөлімшесін толығымен басса, Рахымжан Қошқарбаев пен Қызылжардың шеткі үйлеріне дейін жетіп қалды. Су тасқыны Тайтөбе жақтан Қосшыға да лап беруі бек мүмкін, деп хабарлайды «Алаш айнасы» порталы. Қазіргі кезде Астана қаласына жақын орналасқан Қосшы елді мекенінде төтенше жағдайлар қызметінің мамандары күн-түн демей, арнайы құлақтандыру құрылғылары бар көлікпен көшелерді аралап, жергілікті халыққа ескерту жасап жүр. Ол жаққа су тасқыны Тайтөбе жақтан лап беруі мүмкін. Су сол ауылдың шеткі үйлеріне дейін жетіп қалды. Бірақ оны қолдан жасалған бөгет ұстап тұр. Соңғы бес күн бойы құтқарушылар осы жерде кезекшілік атқарып, судың деңгейін бақылап отыр. Қазір Нұрадан тасып, далаға жайылып кеткен судың деңгейі бөгеттің ернеуіне дейін көтерілген. Біз барғанда, төтенше жағдайлар қызметінің мамандары тосқауылдың орта тұсын күшейтіп, құмға толы қаптарды үйіп жатқан. Себебі ол жер босап, жердің астынан су шыға бастады. Экскаваторда да дамыл жоқ.

Ал Нұраның жоғарғы жағында отырған ауылдарды су басып жатыр. Мәселен, Рақымжан Қошқарбаев (бұрынғы Романовка) елді мекеніне баратын жолда көпір бар. Оның астымен Нұра өзені ағып өтеді. Қазір кезде су көпірдің астымен ағып үлгермей жатыр. Соның салдарынан жолдың жиегімен бірнеше шақырымға көл болып, жайылып кетті. Төтенше жағдайлар қызметінің сарбаздары жолдың бойымен тосқауыл жасап, құм салынған қаптарды үйіп жүр. Үш-төрт сағаттың ішінде су жолдың ернеуінен асып кетеді деген қауіп бар. Сол кезде оны толығымен жауып тастайды. Жергілікті халықтың айтуынша, дәл қазір су Рақымжан Қошқарбаев елді мекенінің шетіне дейін жеткен. Ал оған қарасты Ағанас деген бөлімшені толығымен басып қалды. "Ағанаста су деңгейі үйдің терезесімен бірдей болып тұр. Шінет деген бөлімшеге де кіріп жатыр. Қазір Романовкаға баратын жолды су басса, халық шыға алмай қалады. Нұраның толқыны қатты. Жолдан өтіп бара жатқанда, қорқып отырасын", - дейді жергілікті пошта бөлімшесінің маманы.

P.S. Біз қалаға қайтып бара жатқанда, төтенше жағдайлар қызметі үрлемелі резеңке қайықтарын даярлап, өзен суы тасып жатқан жерлерге апарып жатты.