Астанада әйелімен жанжалдасқан жігіт мешіт қызметкерін пышақтап кеткен
Астанадағы мешіттердің бірінде жұмыс істейтін шаруашылық қызметкерін ер адам пышақтап кетті, деп хабарлайды Azattyq Ruhy.
«Ауыр жарақат алған мешіт қызметкері дәрігерлердің бақылауында. Жағдайы ауыр.
Алдын ала жеткен мәліметтер бойынша қылмыстық оқиғаға отбасылық қақтығыстар, дәлірек айтқанда күдікті азамат пен оның әйелі арасындағы жанжал себеп болған. Бұқаралық ақпарат құралдары өкілдеріне қосымша ресми мәлімет берілетінін хабарлаймыз»,-деп хабарлады Қазақстан Мұсылмандары Діни басқармасының баспасөз хатшысы Ағабек Қонарбайұлы.
Ал, Астана қаласы Полиция департаментінің мәліметіне сүйенсек, Аталған факті бойынша Астана қаласы ПД "Сарыарқа" ауданының полиция бөлімі сотқа дейінгі тергеу амалдарын бастаған.
“Барлық қажетті сараптамалар тағайындалды. Аталған оқиғаға қатысы бар адам қылмыс орнында ұсталды. Ол ПД уақытша ұстау изоляторына қамалды. ҚР Қылмыстық-процестік кодексінің 201-бабы негізінде тергеу мүддесінде сотқа дейінгі тергеп-тексерудің өзге де деректері жария етуге жатпайды”,- деді ПД баспасөз қызметі.
