Алматыда курьер 15 мың теңгенің тапсырысын алып қашып кеткен
Курьерлер үшін сонда кім жауап береді? Біз қалай әрекет етуіміз керек? 15 500 теңге жоғалттым – бұл менің екі жұмыс күнім.
Алматыда курьер дәмханадан 15 мың теңге тұратын тапсырысты алып, қашып кеткен, деп хабарлайды Tengrinews.kz.
Оқиға биыл 15 мамырда болған. Оқиға туралы редакцияның WhatsApp-нөміріне 39 жастағы қала тұрғыны жазған. Сағат 22:00 шамасында ол әйелімен Сейфуллин даңғылы мен Дулатов көшесі қиылысында орналасқан дәмханаға тапсырыс берген.
"Мен кәуап алдым, әйелім тағы бірнеше тағам қосты. Есеп 15 мың 500 теңге болды. Біз сағат 22:10 шамасында "Яндекстің" курьеріне қоңырау шалып, кафеден тапсырыс берген тағамды алуын сұрадық. Қосымшада ол Ильзат есімімен көрсетілген.
Курьер тапсырысты алуға барды, содан кейін біраз уақыттан кейін ақылы күту уақыты қосылды. Содан мекеме әкімшісі берген тапсырысты алып, басқа жаққа қарай бет алды. Біз көрсетілген қосымша нөмірге қоңырау шалдық, бірақ курьер қоңырауды алмады. Осыдан кейін курьер ауысты, бірақ тапсырысты бірінші курьер алып кетті", - деп бөлісті ер адам.
Содан ерлі-зайыпты кешкі ассыз қалып, кафеге өздері баруға мәжбүр болған.
"Яндекстің" қолдау қызметі такси паркіне хабарласамыз деп жазады. Ал такси паркі "Яндекске" хабарласамыз деп жазады. Яғни, бізді анда-мында сілтеп жатыр.
Содан 18 мамырда полицияға арыз жаздық. Бірақ олар "Яндекске" жазу керек болғандықтан, шағымнан бас тартылатынын айтты. Курьерлер үшін сонда кім жауап береді? Біз қалай әрекет етуіміз керек? 15 500 теңге жоғалттым – бұл менің екі жұмыс күнім", - деп шағымданды ер адам.
Осыған байланысты Tengrinews.kz редакциясы алматылық азаматтың сұрақтарын осы жеткізу қызметіне иелік ететін компанияға жолдады. "Яндекс.Доставка" баспасөз қызметі олар клиентке көмектескенін хабарлады.
"Мұндай жағдай болғанына өкінеміз. Біз мұндай жағдайдың мүмкіндігінше сирек болғанын қамтамасыз ету үшін жұмыс істеп жатырмыз. Біз клиентпен байланыстамыз және жағдай қазірдің өзінде шешілді", - деп түсіндірді компания өкілдері.
Кейін зардап шеккен ер адам редакцияның WhatsApp-нөміріне тағы да жазды. Ол редакция өтінішінен кейін мәселесі шешілгенін атап өтті.
"Қазір "Яндекспен" хабарласты, нәтижесінде олар промо-код арқылы ақшаны өтеп берді. Курьерге хабарласа алмадық дейді. Көмек көрсеткендеріңізге рақмет", - деді алматылық тұрғын.
