Алматыда жедел әрекет ету арнайы жасағының қызметкері суицид жасамақ болған ер адамды құтқарып қалды, деп хабарлайды Stan.kz ақпарат агенттігі ІІМ баспасөз қызметіне сілтеме жасап.
Оқиға Әуезов ауданында болған. Түн ортасында инспектор Санат Шөнеков ағаштардың арасынан күдік тудырған адамды байқаған. Жанына барып, асылып қалғанын көрген инспектор дереу әрекет етуге тырысқанын айтады.
"Мен жүгіріп барып, оның аяғынан ұстап, жоғары көтеріп, сымды босатып, адамды түсірдім. Ол есінен танып қалды. Өмір сүру белгілерін көрсетпеді. Сосын мен оның аяғынан ұстап, дем алғанша жоғары қарай көтере бастадым. Бірнеше секундтан кейін ер адам терең дем шығарды. Осы кезде жедел жәрдем келді", – дейді жедел әрекет ету арнайы жасағының аға инспекторы Санат Шөнеков.
"Ол – 37 жастағы С. есімді азамат. Ер адамның неліктен мұндай шарасыз әрекетке барғанын тексеру жұмыстары кезінде анықтаймыз. Қазір ол ауруханада жатыр. Дәрігерлердің айтуынша, оның өміріне ештеңе қауіп төндірмейді. Сотқа дейінгі тергеу амалдары тіркелді", – деді Әуезов АПБ бастығы Ұлан Әбілхайыр.