2019 жылы Алматыда Алма-Арасан және Көк-Шоқы шағын аудандарына газ жүргізіледі
«ҚазТрансГаз Аймақ» АҚ Алматыдағы өндірістік филиалының инвестициялық бағдарламасы аясында 2019 жылы Алматы халқын толықтай газбен қамтамасыз ету үшін Дулати көшесімен 8 шақырымдық орташа қысымы Ø325мм газ құбыры жүргізіледі.
Бұл газ құбыры Алма-Арасан және Көк-Шоқы шағын аудандарына табиғи газ қосуға мүмкіндік береді, сондай-ақ Дулати көшесінің шығыс және батыс жақтарында бүгінде газды қолданып отырған 28 мың абонентті «көгілдір» отынмен қажетті көлемде қамтамасыз етеді.
Жер асты газ құбыры жүргізілетіндіктен Дулати көшесінде Әл-Фараби даңғылынан Алма-Арасан шағын ауданына дейін көлік қозғалысы аракідік шектеледі.
Қаланың осы секторындағы тұрғындар мен көлік жүргізушілеріне аса қолайсыздық туғызбау үшін құрылыс жұмыстарын жолдың тек бір жақ бағытын ғана жауып, бөліп-бөліп жүргізу қарастырылған.
Барлық жұмыстар осы жылдың 1 тамызына дейін аяқталады деп жоспарланып отыр. Қала тұрғындарынан бұл уақытша қолайсыздықтарға түсіністікпен қарауды сұраймыз.
«ҚазТрансГаз Аймақ» АҚ
