«Кітапхананың түнгі әлемі» тамаша өтті
«Кітапхананың түнгі әлемі» деп аталған іс-шараға жиналған қала тұрғындарын кітапхана түнінде арнайы ұлттық нақышта безендірілген қазақы киіз үй, алтыбақан, балаларға арналған ойын алаңдары, кітап көрмелері қарсы алды. Кітапхана алаңында «Еураз-шоу» ән-би театрының бишілері «Кесе сылдыры» биімен шашу шашып, ыстық ықылас танытты. Мерекелік шараны Ә.Қашаубаев атындағы филармониясы оркестрінің концерті жалғастырып, қатысушыларға ерекше көңіл күй сыйлады.
Жиналған қауым бір уақытта бірнеше шараның куәсі болды. Мерекелік шарада қаламыздағы Балалар мен жастар сарайынан, Татар өнер мектебінен, №8 балалар үйінен келген бүлдіршіндер өз өнерлерін ортаға салды. Жиналған балақайлар батут, түрлі үлкенді-кішілі машиналардан жасақталған ойын алаңдарында ойынға қарық болды. Балалар мен жастар сарайынан және «Батыр» спорт клубынан келген өнерлі бишілер мерекеге қатысушы бүлдіршіндерге шеберлік кластарын өткізіп, би өнеріне баулыды. Ғимарат ішіне кітапхананың 130 жылдығына орай Абай заманындағы экспонаттармен жабдықталған «Дариға-ай» жастар театрының Абай мен Михаэлистің ең алғашқы кітапхана қабырғасындағы кездесу сәтін бейнелейтін көрініс жалғастырды. Қойылымның авторлары – Қ.Ж.Нұрқасым мен «Дариға-ай» жастар театрының жетекшісі А.Т. Бахтинов. Бұдан соң алғаш рет кітапхана қызметкерлерінің орындауында, Ж.Аймауытовтың сөзіне жазылған М.Дулатовтың «Алаш гимні» орындалды. Кітапхана жанындағы Қ.Мұхаметханов ескерткіші алаңында «Мәңгілік ел» жас ақындар шеруі өткізіліп, «Шын жүректен жомарттықпен» тақырыбында жергілікті ақын-жазушылар мен ғалымдар М.Сәрсеке, С.Тәбәрікұлы, Т.Ибрагимов, А.Ахметжанов, Д.Омарбаева, М.Сұлтанбеков, Р.Мұқажанова т.б. шығармаларынан жасақталған кітап көрмесінің жанында мерекеге қатысушылар мәдени-шығармашылық қарым-қатынаста болды. Қала тұрғындары ұлттық дастарқаннан дәм татып, жас ақындар арасында айтыс өткізді. Киіз үй алдында «Қазақы дастарқан», «Қазақтың ұлттық ойындары» кітап көрмелері қойылып, қатысушылар үшін әдебиеттерге шолу жүргізілді. Сондай-ақ «Алтыбақан аясында» мерекелік ойын-сауық бағдарламасы аясында алтыбақан, асық, арқан тарту ойнатылып, ұлттық ойындар туралы мол мағлұматтар берілді.
Кітапхана түніндегі барлық бағдарламаларға қала жұртшылығы белсене қатысып, кітапханада оқырмандар қатары жаңа оқырмандармен толықты.
