Тасбөгет көзден неге таса қалды?

Қызылорда қаласының қасында Тасбөгет атты кент бар. Облыс орталығынан таяқ тастам жерде орын тепкен. Кезінде Сырдария ауданының орталығы болды. Кейіннен бұл мәртебесінен ажырап, қаланың құрамына енгізілді. Қалада болғанмен, онда шешілмеген түйткіл бастан асады. Тіпті тұрғындар жұртта қалғандай күй кешеді.

Қайсыбір жылдары Тасбөгетте қос қабатты үйлер салынды. Олар кенттің көркін кіргізді. Өкінішке қарай, бертін келе осы үйлердің базары тарқап кетті деуге негіз бар. Басында, онда барлығы тәп-тәуір болатын. Аталмыш үйлерге газ да тартылған. Жылу да жетіп тұрды. Тұрғындар судан да таршылық көрмейтін. 90-жылдардың ортасында олардың барлығы бірте-бірте жоғала бастады. Осының салдарынан жергілікті жұрт өз қамдарын жасауға кірісіп кетті. Қолдан пеш жасап алды. Қазір барып қарасаңыз, терезеден шыққан мұржаларды көруге болады. Сырттан қараған адам олардың сұрықсыз кейпіне қарап, еріксіз бас шайқайды. Халық ауызсуды тасып ішетін болды. Қысқасы, қала басшылығы тарапынан оларға назар аударған ешкім жоқ. Бұл мәселе шаһардағы шенеуніктерге талай айтылған. Алайда құлақ асқан пенде табылмай тұр. Аталмыш проблема қордаланған күйі әлі күнге дейін жалғасып келеді.
Қос қабатты үйлерді жөндеуден өткізу мәселесі де ескерілмей келе­ді. Осының кесірінен олар алқам-салқам күйде. Пәтер иелері коопе­ра­тиві өжіреде жатқан қажетті заттарды жинап алды. Екі үйді есептен шығарып тастағаны тағы бар. Талай мекеме осы үйлерге қо­жа­лық етуге келеді. Деген­мен көп ұзамай олар да төбе көрсетпей кетіп жатады. Тұрғындар кімге сенерін білмей дал. Бір сөзбен айт­қанда, кенттегі «Наурыз» және «Та­са­рық» мөлтек ауданда­рындағы қос қабатты тұрғын үйлер осын­дай жағдайды бастан кешіріп отырған жайы бар.
Өжіреде жиналған суды айт­пай-ақ қойыңыз. Қолқаны қабатын жағымсыз иіс демалуға қиындық тигізеді. Өжірелер ашық-шашық жатыр. Оларға балалар түсіп кетіп жатады. Жақында Молдағұлова кө­ше­сіндегі қос қабатты үйдің бі­рін­де қайғы­лы оқиға орын алды. Құтқарушылар екі жастағы бала­ның суға толы өжіреден жансыз денесін алып шықты. Бауыр еті бала­сын ажал құрығына беріп, қайғыдан аһ ұрған ата-ана қайда барып, мұң шаға­рын білмейді.

Жұмакүл БАЛАБАЙҚЫЗЫ, Тасбөгет кентінің тұрғыны:
– Есін біле қоймайтын сәбидің қазасынан кейін аталмыш үйлерге байланысты біршама қозғалыс болды. Қос қабатты үйдің проблема­сын шешуге бір мекеме бел шеше кірісті. Олар канализацияны қалпына келтіру үшін тұрғындардың өздері ақша жинау керектігін ескертті. Рас, үйлер жекеменшікке өткізілген. Оған қарсылығымыз жоқ. Дегенмен осы шаруа неге ертерек жасалмаған? Осының себебін жұрт түсіне алмай жүр...
 Жалпы, қалада тұрғаннан кейін әрбір азамат өзіне жайлы тұрмысты іздейді. Өкі­ніш­ке қарай, Тасбөгет­тегі қос қабатты үйде тұратын жұрт ондай игілікті көре алмай отырғаны ойлантады. Әйтпесе, аталмыш кент облыс орталығынан қашық емес. Қа­зір Қызылорда қаласымен ара­лық­та жер үйлер салынып, қосы­лып кетті. Қаланың біраз аумағына жылу тарататын орталық та Тас­бөгет­тен онша қашық емес. Оларға су жүретін құбырларды алып бару­ға да қомақты қаржы керек емес.
Алайда тасбөгеттік тұрғындар осындай игіліктерге әлі күнге дейін қол жеткізе алмай келеді. Оның қашан шешілері де әзір­ге белгісіз.