Серік Ахметов серіктерінің 100 күндік жүгі қандай?

Биыл 24 қыркүйекте іске кіріс­кен Серік Ахметов басқаратын сегізінші Үкімет­ке 100 күннің бедері болып қалды. Әрине, жүз күнде тау қопару, үлкен істерді еңсеріп тастау мүмкін емес. Әйтсе де Серік Ахметов Үкіме­ті­нің осы кезге дейінгі үш ай ішінде бұрыннан жоспарланған қадау-қадау істерге батыл түрде білек сыбана кірісіп кеткені байқалды.

Реформаларға кіріскен Үкімет
Бұған дейін Премьер-министрдің бі­рін­ші орын­басары қызметін атқарған және елдің көптеген салаларын бір кісідей біле­тін Серік Ахметовтің үкіметбасылыққа та­ғайындалуы бұрынғы Үкімет­тердің сая­саты мен бағытын жалғастырауға мүм­кін­дік береді. Бұл осы кезге дейін тұрақты­лық­пен жұ­мыс істеп келе жатқан Үкіметтің үйлесімді ыр­ғағын сақтап, негізгі бағыттар бойынша даму ди­на­микасын жалғас­ты­руға себін тигізді. Елбасы Н.Назарбаев Үкі­метбасы­лық­қа Серік Ахметовтің кан­ди­датурасын ұсынған кезде оның Үкімет қа­быр­ғасында көптеген бағдарламалар мен маңыз­ды шаруаларды жасауға ұйыт­қы болғанын, бұрын­ғы үкіметтің қолға алған бағытын жалғастыратын лайықты тұлға екенін атап өткен болатын. Бұл жа­уапты қызметтердің барлық сатысынан абы­роймен өткен Серік Ахметовтің аса тәжірибелі басшы, білікті экономист, ше­бер менеджер, аймақтардың ахуалын же­тік білетін басқарушы кадр ретінде Елба­сының өзі үлкен сенім артқа­нын, Прези­дент­тің сарабдал саясатын ойда­ғыдай іске асыра алатын тұлға екенін білдірсе керек.
Кәрім Мәсімовтен кейін эстафетаны жалғас­тырған Серік Ахметов Үкіметі құра­мы жаңа есім­дер­мен толықты. Олар: ви­це-­премьер Қ.Көшер­баев, сыртқы істер ми­нистрі Е.Ыдырысов, эконо­ми­калық даму және сауда министрі Е.Досаев, ең­бек және халықты әлеуметтік қорғау министрі С.Әб­денов. Бұл Үкіметте Премьер-ми­нистр­дің бі­рін­ші орынбасары деген лауа­зым жоқ, тек орын­басар бар. Мұның өзі Серік Нығметұлының жоға­ры жауапкер­ші­лік пен шаруашылық жағынан белсенді әре­кет етуіне жағдай жасайды. Министр­лер Каби­нетінің кадрлық құрамының көп өзге­ріске ұшырай қоймағаны да бұрынғы Үкіметтердің бағытымен сабақтастығын сақтайтынын көрсетсе керек. Қалай деген­мен, Серік Ахметов Үкіметінің құрамы мық­ты. Үкіметте екі мәрте министр крес­ло­сын жаңарт­қан салмақты шенеуніктер жетерлік, мәселен Е.До­саев, Н.Қаппаров, Е.Ыдыры­совтар­ды айтуға бо­лады.
Басқа шенеуніктердей емес, атынан ат үркетін қызметтердің басын қайырған Серік Ахметовтің жүзі жылы, мінезі жібек­тей деседі жұрт. Ол тех­нократ кадрлардың өкілінен саналғанымен, ұлт­жанды басшы ретінде төл мәдениетті ешқашан қал­та­рыста қалдырған емес. Қарағанды өңірін­де әкім болып тұрған кезде бірқатар қазақ мектептері ашылды, тарихи тұлғаларға ескерт­кіш орнатылды, иісі қазаққа ортақ ақын-жазушылардың, «Қазақ магнит­касы» атанған Теміртаудың жарты ғасыр­лық мерейтойлары дүрілдеп өтті. Премь­ер-ми­нистр Серік Ахметовтің Үкімет оты­рыс­тарын мем­лекеттік тілде өткізіп жүр­гені, министрлердің қазақ тілінде баян­дама жасауға көшуі қуантарлық жайт.
Моноқалаларды дамыту, Қолжетімді баспа­на-2020 бағдарламасын одан әрі жал­ғастырып, қоғамда өзекті болып отыр­ған жастар мәселесін шешуге Үкімет­тің айрықша ден қоя бастағанын жақсы­лыққа баладық.
Қай жұмыста болмасын оның артынан шу шық­қан емес, әлдебір топтардың қата­рынан да аты аталмайды, қандай да бір көлеңкелі бизнестің ар­тынан құлағы қыл­тиды дей алмаймыз. Үкімет­басының мі­не­зі жібектей болғандықтан ба, ешқан­дай топтармен текетірес байқалмайды, тіпті Үкі­мет мүшелерінің арасында бола­тын ам­би­циялық қай­шылықтар туралы дерек жоқ.
Жаңа Үкіметтің өзіндік стилі – стратегияға басымдық беру
Елбасының «Қазақстан-2050» страте­гиясы қалыптасқан мемлекеттің жаңа саяси бағыты» атты 2050 жылға дейінгі жаңа стратегиясы Үкіметке стра­тегиялық саясат­ты жүзеге асыруды міндет­тейді. Жаңа стратегия Үкіметті бұдан да ауқымды, ұзақ­мер­зімді, кешенді жұмыстарды атқару­ға жұ­мылды­рады. Серік Ахметов Үкіметінің жұмыс стилі мен сипатының ерекшілігі де осында болса керек.
Елбасының «Қазақстан-2050» страте­гиясы қа­лыптасқан мемлекеттің жаңа саяси бағыты» 2050 жылға дейінгі жаңа страте­гияны жүзеге асыру тұр­ғы­сындағы жалпы­ұлттық жоспар жасалды. 2013-2015 жыл­дарға арналған республикалық бюджет жобасы бекітілді. Осы кезге дейін шегеріліп келген «Халықтық ІРО» бағдарламасы жү­зеге асы­рыла бас­тады. Бірінші болып 2012 жылы «Халық­тық IPO»-ға «ҚазТрансОйл» АҚ шығады. Одан кейін 2013 жылы IPO-ға «KEGOC» АҚ, «Казморт­рансфлот» ҰТКК» АҚ, «Самұрық-Энерго» АҚ және «КазТранс­Газ» АҚ шығарылады.
«Ақпараттық Қазақстан-2020» мем­лекеттік бағ­дарламасы және Агроөнер­кәсіптік кешенді дамытудың 2013-2020 жылдарға арналған са­лалық бағдарлама­сының жобасы жасалды.
Алыс-жақын мемлекеттермен страте­гия­лық әріптестік, көрші елдермен тығыз ынтымақтас­тық­тың көкжиегі кеңейе береді. Жаңа Үкіметтің сыртқы саяси бағытының өзегі де осы. Премьер-министр Серік Ахме­тов 100 күн ішінде Герма­нияға, Ресейге, Қыр­ғызстанға, Өзбекстанға жұ­мыс сапа­рымен барып, ондағы әріптестерімен кездесті. Астанада бірқатар елдердің Үкімет бас­шыларымен кездесіп, бизнес-форумдар өткізді. Шетелдік мәртебелі қонақтармен Астанада кездесті.
Елдегі Қостанай, Атырау, Маңғыстау, Оңтүстік Қазақстан облыстарын аралап, Жаңаөзен қаласы­ның жағдайымен танысып, жұртшылықпен кезде­сіп қайтты. Бұл Серік Нығметұлының кабинеттік емес, нағыз істің, шаруаның адамы екенін байқат­ты. Өңірде басшылық ете жүріп ысылған, жергілікті ахуалды жете білетін Серік Ахметовке Қазақстан­ның кез келген аймағындағы жағдаяттар мен мәсе­лелер таңсық емес.
Іскерлік, басшылық тәжірибесі мол Серік Нығ­мет­ұлы қай салада болмасын өз ісінің білгірі екенін дәлелдей білді. Тәжірибелі экономист-практик ре­тінде сауатты және жауапты басшы екенін мойын­датты. Көлік және коммуникация министрі бола жүріп 2015 жылға дейінгі Көлік стратегиясын қа­был­дап, оның бірқатар ірі жобалар, атап айтқанда, Аста­на-Бурабай жол құрылысы, Батыс Еуропа-Батыс Қытай» жобасын жүзеге асыруға атсалысты. Қара­ған­ды облысын басқарып тұрған кезде үде­мелі индустриялық-инновациялық бағдарлама­ларды іске асыру бойынша өңірді бүкіл ел бойынша алға шығарды. Қарағанды облысын басқарып жүр­ген кезде аймақтың базалық өнеркәсібі сала­сын дамыту концепциясын әзірлеуді ұсынды. Өн­дірісті облыста сол кездері 12 жаңа өндіріс орны ашылып, 5 мыңнан астам жұмыс орны ашылды. Кредиторлар халық­аралық ұйымы Ресейдің Орлов облысы, Украинаның Қырым аймағымен бірге Қарағанды облысы да ТМД-ның ең динамикалық дамушы аймақ номина­циясын иеленіп, «Инвес­тициялық періште» сыйлы­ғын алған еді. Бұл жағы­нан келгенде, Серік Ахметовті аймақтар жайын жақсы білетін елдегі санаулы топ-менеджерлердің қатарына қосуға болады. Еңбек жолын Қарағанды металлургия зауытында қара­пайым токарь болып бастаған Серік Нығметұлын қа­зір­гі Үкімет басшысы биігіне көтерген де ерен еңбек пен кәсіби біліктілік екеніне дау болмаса керек.
Елбасымыз айтқан қазіргі әлемнің дамуын айқындап отырған «үшінші индустриялық револю­ция» дайын болу қажеттігі тұрғысынан келгенде С.Ахметов Үкіметі атқаруға тиісті шаруа аз емес. Елбасының Қазақстан-2050 жобасы Үкіметке ай­мақтармен тығыз жұмыс істеуді міндеттейді. Себебі келесі жылдан бастап жергілікті жерлерде әкімдер­ді сайлау қолға алынбақ. Бұдан өзге бұрындары алты-жеті облыс республикалық бюджеттің донор­лары болып саналатын, ал қазіргі Атырау, Ақтау және Алматы болып отыр. Аймақтар жайын ретте­ме­йін­ше, әлеу­мет­тік мәселелерді, стихиялы урба­ни­зация үрдісін үйлестіру мүмкін емес. Оның үстіне бірқатар отандық басылымдарда аймақтық даму жөніндегі министрлік құру жөнінде айтылып қал­ды. Теміртау қаласын, Қарағанды облысын бас­қар­ған С.Ахме­тов Үкіметі аймақтардың әлеуетін көте­ру бағы­тында біраз шаруа жасайтынына шүбә жоқ.

Сайып келгенде, алдағы уақытта Серік Ахме­тов Үкіметінің алдында ДСҰ-ға кіру, Қазақстан-2050 стратегиясында белгіленген басымдықтарды іске асыру секілді қыруар міндеттер тұр. Жүз күнді артқа тастаған жаңа Үкімет алдыға қойған шаруаның бәрін еңсеріп жатыр деу ағаттық болар, дегенмен Елбасы тапсырмаларын тыңғылықты орындап, әлеуметтік жаңғыру бағытында көп жұмыстар атқаруы керек.