Мектептердегі жылу жүйесінің жаңа оқу жылына дайын болмауы жыл сайын қайталанбауы үшін қандай механизм ұсынар едіңіз?

Динар НҮКЕТАЕВА, Мәжіліс депутаты:
– Дәл қазіргі таңда еліміздегі білім беру ошақтарының 55 пайызының жылу маусымына дайын еместігі анықталып отыр. Алайда кеше ғана білім және ғылым министрі Жансейіт Түймебаев мырза осы салаға қатысты мамандардың барлығын жинап алып, тез арада мектептерді жылу маусымына дайындауды тапсырды. Және жаңа оқу жылына мектептердің дайындығы дұрыс болмаған жағдайда аудан әкімдері мен аудандық білім беру басқармаларының басшыларын жұмыстан босатуға дейін баратынын қатаң ескертті. Бүгінде бұл жағдайлардың барлығы тікелей Премьер-министрдің қадағалауында тұр. Сондықтан жылу маусымы басталғанша жоғарыдағы кемшіліктердің барлығы қалыпқа келер деп ойлаймын. Ал алдағы уақытта мектептердің дайындықсыздығы жылда қайталанбас үшін мектептің жаңа оқу жылына дайындығына жауапты мамандардың жауапкершілігін арттыру керек. Расында да, бір кемшіліктің жыл сайын қайталанып отыруы абырой емес. Осындай қатаң қадағалаулар бола берсе, мектептер дер кезінде сақадай сай тұруға қалыптасар еді.

Ернар МӘСӘЛІМ, Алматы қалалық №154 қазақ орта мектебінің директоры:
– Өз мектебім туралы айтар болсам, қазір өз басшылығымдағы мектеп 100 пайыз жылу маусымына дайын тұр. Өйткені ол мектеп жеке автономдық жылыту жүйесіне қосылған. Сондықтан айтарлықтай көп мәселе тудыра қойған жоқ. Мамыр айында келісімшартқа отырып, барлығын дайындап алдық. Ал, жалпы, қаладағы мектептер жайына келер болсақ, мектептің жылу маусымына дайын болуына әкімдіктермен қатар, білім басқармалары, мектеп директорлары да жауапты. Олардың әрқайсысының өздеріне жүктелген міндеттері бар. Егер олар сол жүктелген міндеттерін мүлтіксіз атқарар болса, ешқандай кемшілік орын алмас еді. Сондықтан осы мекемелердің жауапкершілігін арттырсақ болғаны.

Айткүл САМАҚОВА, Мәжіліс депутаты:
– Бір кемшіліктің жыл сайын қайталана беруі дұрыс қадағалаудың жоқтығын көрсетіп отыр. Сондықтан Премьер-министрдің тапсырмасындай, мектептерді дер кезінде жылу маусымына дайындап үлгермеген басшыларды жазалау керек. Жоғарыдан бұйрық берілмейінше қимылдамайтын басшылармен қатаң сөйлесетін кез жетті. Және білім беру мекемелерінің уақтысында дайын болмауының себептерін іздестіріп, оны жоюмен айналысу қажет. Дер кезінде ақша аударылмаса, неге аударылмауының себептерін анықтап, бөлінген қаржыны дұрыс игерер басшы болмаса, оны ауыстырып, жалпы, кемшіліктердің алдын алумен жұмыс істейтін кез жетті.