Осыдан біраз күн бұрын теледидардан Нұр-Сұлтан қаласының 34 жастағы тұрғыны Юрий Толочконың қуыршақ қызға үйленуге ұсыныс жасағаны туралы айтты. Онда ол Марго есімді қуыршақпен дос болғанына жарты жылдың жүзі болғанын, Маргомен бірге түнгі клубқа, киноға, мейрамханаларға барып тұратынын айтады.
Иә, қызды қуыршақпен алмастыратын мұндай жандарды идоллаторлар деп атайды екен. Идоллаторлар жаны жалғыздықтан жапа шеккенде осындай «қыздарға» махаббатын арнайтын көрінеді. Ал олардың серік етіп жүргендері – манекен секілді адамның бойымен бірдей етіп, силиконнан ерлерге арнап жасалған қуыршақтар. Көбіне бұл «ойыншақтарды» аяқ-қолын бүгуге, мойнын бұруға, басқа да қимыл-қозғалыстарға келтіруге болатындай етіп жасайды.
Бір қызығы, мұндай жасанды «сұлулардың» бағасы да арзан тұрмайды екен. АҚШ-тың Калифорния штаты Сан-Маркос қаласында «RealDoll» компаниясы адамнан аумайтын қуыршақтарды әр тапсырыс берушіге арнайы дайындайды. Сатып алушы адам оның бойын, салмағын ғана емес, көзінің түсіне дейін өз қалауындағыдай етіп жасата алатын көрінеді. Бір қуыршақты айға жуық уақыт жасайды. Салмағы 30-40 кило болатын бұл қуыршақтардың интернет-дүкендегі бағасы 1-4 миллион теңгенің аралығын құрайды екен.
Қуыршақты серік ететін ерлер әсіресе Жапонияда көбірек көрінеді. Солардың бірі – 45 жастағы Масаюки Озаки. Ол Мая есімді қуыршақ-қызы, әйелі және кішкентай қызы үшеуі бір шаңырақ астында тұрады. Дегенмен оның махаббаты әйеліне емес, Маяға ауған. Озаки көбіне-көп қуыршақ әйелін өз қалауындағыдай етіп киіндіріп, түрлі үлгідегі жасанды шаш кигізіп, тіпті әшекейлеріне дейін тағып, көшеде өзімен бірге алып жүруді әдетке айналдырған. Мүгедектер арбасына отырғызып алып, бірге дүкен аралайды, серуендейді, сырласады, әңгімелеседі. Ұйықтарда қасына алып жатады. Шомылдырады, киіндіреді. Оған тірі адамдай қарайды.
Озакидің әйелі болса, жолдасының бұл тосын мінезіне еріксіз көндіккен көрінеді. Озакидің өзі жапон әйелдерінің суық әрі өзімшіл екенін алға тарта отырып, Маяның өз сөзін үн-түнсіз тыңдай алатынын, оны сол үшін де өте жақсы көретінін, өлгенде де өзімен бірге жерленгенін қалайтынын айтыпты.
Озаки секілділер бұл елде аз емес екен. Жапонияда жылына екі мыңға жуық адам бағасы 6 мың доллардан жоғары тұратын қуыршақтарды сатып алатын көрінеді. Мұндай жандардың түсінігінде жасанды «қыздар» ешқашан шағым айтпайды және дауласып, жанжалдаспайды, не айтса да үнсіз тыңдайды және айтқанға көнеді. Содан да болар, қуыршақ-қыздармен «қарым-қатынаста» болатын жапониялық ерлердің саны жыл сайын өсіп келе жатыр екен. Бүгінде бұл елдегі туу көрсеткішінің төмендеуінің бір себебі осы болып отырған көрінеді.
Қуыршаққа құмарлық тек ерлерде ғана емес, ана болуды армандап жүрген әйелдерде де кездеседі екен. Кәдімгі баладан айнымайтындай етіп жасалаған сәби қуыршақтар ана атана алмайтын әйелдерге психологиялық тұрғыдан өз уайымын жеңуге септігін тигізетін көрінеді. Олар қуыршақ-сәбиге өз баласындай қамқорлық танытып, өзімен бірге серуенге алып шығады. Мұндай реборн-қуыршақтардың салмағы да, бойы да кәдімгі сәбидікіндей болады, тіпті оның кейбіріне баланың жүрек соғысын білдіретін құрылғылар да орнатылады. Бұл қуыршақтар балаларға арналмаған, оны тек әйелдерге ғана арнап жасайды, сондықтан мұндай реборндардың бағасы да арзан тұрмайды.
...Иә, әлемде осындай да қызығушылықтар бар екен. Ал оның психологиялық ауытқушылық не қалыпты жағдай екені түсініксіз. Өзіңе жақын жанды қуыршақпен алмастыратын мұндай әрекет адам мен адам арасындағы қарым-қатынастың жоғалып бара жатқанының бір белгісі емес пе екен?
М. БИБОЛ.
www.zamana.kz