Ардақ Жамансарыұлы Әмірқұлов

 Ардақ Жамансарыұлы Әмірқұлов 1955 жылы 10 желтоқсанда Жамбыл облысы Талас ауданында дүниеге келген. «Ардфильм» компаниясының директоры, кинорежиссер, продюсер, Қазақстан Республикасы Мемлекеттік сыйлығының лауреаты.
Бүкілодақтық мемлекеттік кинематографистер институтын бітіргеннен соң Темірбек Жүргенов атындағы Алматы көркем театр институтының оқытушысы, профессоры болып қызмет еткен. 1988-1992 жылдары - «Қазақфильм» киностудиясының кинорежиссері. 1992-1996 жылдары - «Қазақфильм» киностудиясының бас директоры қызметтерін атқарған. Ол түсірген «Отырардың күйреуі» фильмі Монреалда (Канада) өткен Халықаралық кинофестивальда ФИПРЕССИ сыйлығына, Фигейра да Фошта (Португалия) өткен Халықаралық кинофестивальда «Серебряная пластина» сыйлығына, Ашхабатта (Түркменстан) өткен Халықаралық кинофестивальда «Серебряный полумесяц» сыйлығына ие болып, Алматыда өткен «Қазақ киносы - бүгін» байқауында Гран-приді жеңіп алған. 1997 жылы режиссердің «Абай» атты фильмі Ташкент қаласында өткен Халықаралық кинофестивальда «Ұлттық дәстүрлерді сақтағаны үшін» номинациясы бойынша «Серебряный Семург» сыйлығына ие болса, 2008 жылы «Қош бол, Гүлсары» кинофильмі Астанада өткен V Халықаралық «Еуразия» кинобайқауында Гран-приді жеңіп алған. Сонымен қатар «Шанхай» кинофильміне продюссер болып, «Абай», «Записи Рустема с картинками» сынды тағы басқа фильмдерді түсірген.