Балқашта 150 гектардан аса қамыс тоғай өртенді
Іле-Балқаш резерваты аумағында 150 гектар жер өртеніп жатыр, - деп хабарлайды Alashainasy.kz. Бұл туралы Tengrinews.kz тілшісі Алматы облысы ТЖД баспасөз қызметіне сілтеме жасап жазды.
"Іле-Балқаш резерватының (кірме жолдар жоқ аралшықтар және қолжетімділігі төмен батпақты жерде) аумағында 150 гектар алаң жанып жатыр. Өрттің жалпы аумағы шамамен 6200 гектар болды, оның ішінде сөндірілгені - 6050 гектар", - делінген хабарламада.
ТЖД және "Іле-Балқаш" МТР" РММ күштерімен қолмен жұмыс жасайтын шанц құралдары мен мотопомпаларды пайдалана отырып, жаяу тәртіппен солтүстік-батыс жағында 6-кварталда алдын ала болжам бойынша 150 гектар алаңда өрт сөндіру жұмыстары жүргізіліп жақаны айтылды.
"Сонымен қатар, Бақанас орман шаруашылығы учаскелерінде өрттің таралуын болдырмау үшін Орман шаруашылығы күштерімен жырту жұмыстары жүргізіліп жатыр. Елді мекендерге қауіп жоқ.
Метеорологиялық жағдай: күн ашық, жауын-шашынсыз, ауа температурасы +24 градус, солтүстік бағытта соққан желдің жылдамдығы - 2 м/с", - делінген хабарламада.
Сондай-ақ, ведомство өкілдері әлеуметтік желілерде таралған космомониторингтің суреттері бүгінгі күні өзектілігін жоғалтқанын айтты.
Әлеуметтік желі қолданушылары алғашында өрт Қарағанды облысының аумағында болып жатыр деп болжаған. Алайда облыстық Төтенше жағдайлар департаменті олардың аумағында өрт болмағанын атап өтті.
