Елорда әуежайында заңсыз такси қызметімен айналысқан жүргізуші екі тәулікке қамауға алынды, деп хабарлайды ҚазАқпарат Polisia.kz-ке сілтеме жасап.
«Астана қаласы әуежайындағы желілік полиция бөлімінің қызметкерлері патрульдеу барысында №1 терминалда елорданың 37 жастағы тұрғынын анықтады. Ол әуежайдан шыға берісте жолаушылардың мазасын алып, такси қызметін ұсынып, тәртіп сақшыларының ескертулеріне құлақ аспаған.
Сонымен қатар ер адам полиция бөлмесіне жеткізу кезінде полицейлердің заңды талаптарына бағынбаған.
Оған қатысты ҚР ӘҚБтК-нің 449-бабының 1-бөлігі (Қоғамдық орындарда тиісу) және 667-бабы 1-бөлігі (Құқық қорғау органы немесе арнаулы мемлекеттік орган, әскери полиция органы, мемлекеттік фельдъегерлік қызмет қызметкерінің (әскери қызметшісінің), сот приставының, сот орындаушысының заңды өкіміне немесе талабына бағынбау) бойынша әкімшілік хаттамалар толтырылды.
Астана қаласының мамандандырылған ауданаралық әкімшілік сотының шешімімен құқық бұзушы екі тәулікке қамауға алынды», - делінген полиция ақпаратында.
Еске салайық, 2 сәуірде заңсыз такси қызметімен айналысқан тағы бір жүргізуші Астана әуежайындағы полиция қызметкерлерінің заңды талабына бағынбай, әкімшілік жауапкершілікке тартылған болатын.
Жалпы жыл басынан еліміздің әуе және теміржол көлігі нысандарында көлік полицейлері қоғамдық орындарда адамдардың мазасын алғаны үшін 778 тұлғаны әкімшілік жауапкершілікке тартты. Оның 220-сы – заңсыз такси жүргізушісі.