Пайдаланылмай қалған еңбек демалысына ақы қалай төленеді?

Мен бір мекемеде алты жыл жұмыс істеп, енді басқа мекемеге ауысқалы жатырмын. Алдыңғы істеген жұмыс орным бойынша, әртүрлі себептермен соңғы төрт жылдың еңбек демалысын толық алған жоқ едім. Енді басқа мекемеге жұмыс ауыстырып кетуіме байланысты, алғашқы жұмысым бойынша есеп айырысқан кезде есепші «бұрынғы пайдаланбаған еңбек демалысы күндеріне ақы төлемеймін, соңғы жыл үшін ғана төлеймін» деп отыр. Есепшінің осы әрекеті заңды ма?
Құрбан Тоқмырзаев, Оңтүстік Қазақстан облысы
Сарапшы маманның мәліметіне қарағанда, Қазақстан Республикасы Еңбек кодексінің 110-бабына сәйкес, еңбек шарты тоқ­татылған кезде жыл сайынғы ақылы еңбек демалысын (жыл сайынғы еңбек демалыстарын) пайдалан­баған немесе толық пайдаланбаған қыз­меткерге жыл сайынғы ақылы еңбек дем­алысының (жыл сайынғы еңбек демалыс­та­рының) пайда­ланылмаған күндерi үшiн өтемақы төлемi жүргiзiледi. Өтемақы еңбек демалысының (жыл сайынғы еңбек демалыстарының) барлық пай­даланылмаған күндеріне жүргізіледі.
Жыл сайынғы ақылы еңбек демалысына құқық беретiн жұмыс өтіліне:
1) нақты жұмыс iстелген уақыт;
2) қызметкер нақты жұмыс iстемеген, бiрақ оның жұмыс орны (лауазымы) мен жалақысы толық немесе iшiнара сақталған уақыт;
3) қызметкер еңбекке уақытша жарам­сыздығына, оның iшiнде жүктiлiгiне және боса­нуына орай демалыста болған уақытына бай­ланысты нақты жұмыс iстемеген уақыт;
4) қызметкер жұмысына қайта алыну алдында нақты жұмыс iстемеген уақыт қосылады.
Пайдаланбаған демалыс күндерінің саны жыл сайынғы ақылы еңбек демалысына құқық беретiн жұмыс өтіліне үйлесімді есептеледі.
Жоғарыда аталған өтемақы төлемін есеп­теудің тәртібі «Орташа жалақыны есептеудің бірыңғай ережесін қолдану жөніндегі әдістемелік ұсыным­дарды бекіту туралы» Қазақстан Респуб­ликасы еңбек және әлеуметтік қорғау ми­нистрінің 2008 жылғы 3 маусымдағы 135-ө бұй­рығымен бекітілген.