Ғаламторда вирусты сайттар көбейіп келеді

Компьютерімде антивирустық бағдарлама орнатылған болса да, кейбір сайттардың әсерінен вирус еніп кете береді. Және мұндай вирустар көпшілік күнделікті тұтынатын ресурстарда да болатынын байқадым. Жалпы, ғаламторда осындай қауіпті сайттардың саны қанша?Жамбыл Сенбекұлы, Алматы қаласы

Symantec антивирустық компаниясының мәліметінше, дербес компьютерге зияны күшті сайттардың санында есеп жоқ. Мұндай ресурстар күн санап көбейіп жатыр. Олардың көбі уақытша әрекет етіп, қауіпті вирусты таратқаннан кейін жоғалып кетуі мүмкін. 2009 жылғы 1 тамызға дейінгі санақ бойынша, әзірше ең қауіпті делінген алғашқы 100 веб-сайттың тізімі белгілі. Олардың электронды мекенжайлары өзгеріп отыруы мүмкін. Бірақ мазмұны біркелкі – ғаламтор тұтынушыны алдап, құқықтық кеңес, азық-түлік саудасы, мәнерлеп сырғанау, бұғыға саятшылық жасау, тегін бейнеклиптер көшіру сияқты қызметтер ұсынуы мүмкін. Аталған интернет-ресурстарда вирусты қауіпке қарсы кейбір бағдарламаларды «айналып өтіп» жұқтырудың 18 мың түрлі әдісі болады екен. «Құрт», «Троян», «Руткит» аталатын вирустарды жасырын түрде тарататын шпион-бағдарламалар да бар. Сондықтан порнографиялық сайттар мен анекдот, ән, клип, кітаптар сияқты дүниелерді жарнамалап, насихаттайтын веб-беттерден аулақ болған жөн.