Экономикалық термин көбейді

Еліміз Тәуелсіздік алған соң, экономикасы да түгелдей жаңғырды. Демек, экономикалық терминдер көбейді. Тәуелсіздік жылдары дүниеге келген экономикалық терминдер қандай? Олар қазақшаланып, бір ізге түсірілді ме?
Маржан СӘКЕНҚЫЗЫ
Расында да, еліміз егеменді ел санатына қосылып, нарықтық экономикаға көшуі барысында экономикадағы түбегейлі өзгерістер толып жатқан жаңалықтарды алып келді. Мұның өзі баламалы терминологияны пайдалану қажеттігін талап етті. Экономиканың түрлі салаларында жаңа категориялар мен ұғымдар, терминдер мен терминологиялық тіркестер пайда болды. Бұл терминдер орыс тілінен қазақ тіліне аударылып, ұлттық экономикалық сөздік қорымызды молықтырды. Жаңа терминдер экономикалық өзгерістердің жарқын көрсеткіші іспетті. Мәселен, қа­зіргі заманға сай экономикалық сөз­діктің құрастырушысы С.Тоқсанбай өзінің 1999 жылы жарық көрген «Толық эконо­ми­калық орысша-қазақша сөздік» атты көлемді кітабымен аудармашыларға, қар­жы-кредит саласының қызметкерлері мен экономистерге кеңінен танымал. 80 000 терминді қамтыған аталмыш сөздік қалың оқыр­ман қауым тарапынан жақсы бағаланып, аудармашылар мен экономистер, қаржы-кредит саласының мамандары арасында қолдан түспейтін көмекші құралға айналды.
Сондай-ақ Тәуелсіздік жылдары қол­данысқа енген және қазақшаланған экономикалық терминдердің өте көп екенін айту керек. Айталық, баспабас – бартер, делдал – брокер, жобақаржы – смета, демеуқаржы – дотация, шотесеп – расчет, мүлікбасы – товаровед, рынок – нарық, конкуренция – бәсеке, совершенная конкуренция – кемел бәсеке, совершенная монополия – кемел монополия деген сияқты кете береді.