«Болашақтықтар» қайда жүр?
Жақында «Болашақ» бағдарламасымен шетелге оқуға кеткен бір топ түлектерге халықаралық іздеу жарияланды деп естіп едім. Оның себебі неде?
Ардақ ТӨЛЕНДИЕВ, Талдықорған қаласы
Негізінде, «Болашақ» стипендиясы тағайындалғаннан кейін, әрбір иегер мен «Халықаралық бағдарламалар орталығы» АҚ арасында келісімшарт жасалады. Бұл келісімшарт бойынша әрбір стипендиатқа міндетті түрде жақсы оқу, оқуын тәмамдаған соң Қазақстанға қайтып келіп, бес жыл еңбек ету туралы міндет қойылады. Сонымен бірге орталықта шетелдегі оқуды ұйымдастыру және мониторинг жүргізу басқармасы да бар. Бұлар білім сапасын қадағалайтын болса, орталықтың заң бөлімі стипендиаттардың міндеттемелерді орындауларын қадағалайды. Егер стипендиат елге қайтып келмеген және басқа да шарттарды бұзған жағдайда оған жұмсалған шығын өндіріп алынады. «Болашақ» бағдарламасы жүзеге аса бастаған 1993 жылдан бастап 2005 жылға дейін шетелде оқып, Қазақстанға қайтып келмеген, яғни өз міндеттемелерін орындамаған 29 адам анықталған.
Ресми мәліметтерге жүгінсек, «Халықаралық бағдарламалар орталығы» АҚ құрылған 2005 жылдан бастап бүгінгі күнге дейін «Болашақ» бағдарламасының 25 түлегі Білім және ғылым министрлігіне хабарласып, өздерінің оқуын бітіріп, жұмысқа орналасқандығы туралы «Халықаралық бағдарламалар орталығына» ақпарат бермеген. Сондықтан да оларға құқық қорғау органдарымен бірлесіп іздестіру жұмыстары жүргізіліп жатыр.
