Бәйшешек тек ақ түсті бола ма?
Көктемнің алғашқы гүлі бәйшешектің біздің елімізде ақ түсі жиі кездеседі. Осы бір нәзік гүлдің басқа түстері бола ма? Бәйшешектің отаны қай ел?
Айгүл БЕКОВА, Алматы облысы
Қар кетер-кетпестен қара жердің бауырын жарып шығатын бәйшешек гүлі әр елде әртүрлі болып келеді екен. Мысалы, Сібір жақтағы бәйшешектердің түсі көгілдір-күлгін түсті болса, енді бір жерде көк, тағы бір аймақтарда сары болып келеді. Жалпы бәйшешек Амур бойы Сахалин және Солтүстік Кавказ аймақтарында өседі. Ал ақ түсті нағыз бәйшешектің негізгі отаны – Оңтүстік Еуропа. Бәйшешек негізінен таулы ормандарда, ылғалды топырақта өседі. Бәйшешектің латын тіліндегі ғылыми атауы – галянтус. Бұл атаудың түбірі грек сөздерінен тұрады: «гала» – сүт, «антус» гүл дегенді білдіреді. Бәйшешектің енді шешек жарайын деп тұрған гүлі сүттің тамшысына ұқсайтын болған соң, оған осындай атау берілсе керек. Бәйшешек – ерекше қорғалатын, Қызыл кітапқа енгізілген өсімдік. Ең нәзік әрі суыққа төзімді бәйшешек гүлі Қазақстанның барлық аймақтарында дерлік өседі.
