«Праймериз» дейтін сөзді кейінгі кезде жиі еститін болдық қой. «Primary» - партияның өз ішінде болатын сайлауға дейінгі науқан. Атқарушы не заң шығарушы органға сайлау басталмай тұрып соған ең лайықты, халыққа ең танымал кандидаттарды өстіп алдын ала іріктеп алады. Мұндай дәстүр халықтың саяси сауаты мен саяси бәсекелестік күшті дамыған елдерде баяғыдан бар. Америкада, мысалы, «праймериз» - сайлаудың алдында өтетін ең тартысты, ең қызықты науқан саналады. Олар өз араларында (партияның ішінде) «кокус» деп аталатын тағы бір осындай пікірталас өткізеді. Біздің айтысқа қатты ұқсайды осы кокусы. Онда да айтыстағыдай сөзбен «салғыласып», қоғамдағы ең өзекті мәселелерді талқылап, бір-бірімен бәсекеге түсіп жатады. Жалпы, Америкадағы саяси науқанның қазақтың өміріне келетін жағы да, «Жеті жарғымен» ұқсастығы да көп. Ол туралы кейін жазармыз. Сондықтан, «Нұр Отанның» ішінде өтетін праймеризден де, «праймериз» деген таңсық сөзден де соншалықты шошымауымыз керек. Бұл жаңалық билік партиясындағылардың жігерін жанып, оның бағдарламасына болашақта халықты тартуы мүмкін. Ондай кезде күшті-күшті идеялар айтылып, халықтың ойынан шығатын небір керемет бастама көтеріледі. Партия сонда бұрынғыдай қатып қалған рамкадан шығып, халықтан алыстамай, қоғамдағы өзекті нәрселерге күн тәртібінде тұрған мәселе ретінде қарай бастайды. Қоғамға аз да болса ілгерілеу алып келетін кез келген жаңалыққа қуана білген жөн. Сондықтан мен өзім партияның мұндай саяси қадамға барып жатқанына қуанамын. Уақыт бір орнында тұра бермейді ғой. Әлемде күн сайын, сағат сайын бір жаңалық болып жатыр. Осындайда бір жерде омалып отыра бермей сол жаңашылдықты (реформаны) өзімізге де әкеп енгізіп, саясатта да, қоғам өмірінде де біртіндеп болсын өзгеріс жасап жатсақ керемет емес пе!
Жолымбет Мәкіш
Фейсбуктегі парақшасынан