Жасанды азық-түлік ұрпақ денсаулығына зиян

Кеше Алматыдағы республикалық санитарлық- эпидемиологиялық стансада генетикалық модификацияланған тағам түрлерін зерттеу мәселелеріне арналған екікүндік семинар басталды. Жиын барысында генетикалық түрлендірілген өнімнің пайдасы мен зиянды жақтары айтылып, туындаған мәселелерді шешу жолдары қарастырылады. Оған еліміздің барлық аймағынан арнайы мамандар қатысуда.
Жыл өткен сайын әлемнің барлық ел­дерінде генетикалық түрлендірілген, яғни құ­рамы жасанды жолмен өзгертілген азық-түлік өнімдері кең тарап келеді. Өнім құрамын өзгерту, негізінен, ауыл шаруа­шылығы ғылымында астық шығымды­лығын жақсарту мақсатында қолданы­лады. Мұндай азық-түліктер жөнінде ға­лымдардың пікірі сан алуан. Бірқатар шетелдік зерттеушілер «бұл тағам тап­шылығынан құтқару үшін қажет» десе, мамандардың енді бір тобы оның адам денсаулығына қаупі барын алға тартады. Соңғыларының айтуынша, құрамы жа­санды жолмен өзгертілген өнімді тұтыну, ең әуелі, өмірге кемтар ұрпақтың келуіне әкеп соғады.
Республикалық санитарлық эпидемио­логиялық стансыға қарасты бактерио­ло­гиялық зертхана меңгерушісі Алма Са­па­бекқызының айтуынша, бұл тақырып елі­мізде әлі толық зерттелмегендіктен, мұн­дай өнімдердің зияны мен пайдасы жө­нінде нақты шешім айту қиын. Аталмыш мекеме шетелдерден әкелінетін тұтыну тауарларына, оның ішінде ет, сүт, жүгері мен соя өнімдеріне тексеру жұмыстарын тұрақты жүргізіп келеді. «Елімізге бүгінге дейін жеткізілген тұтыну өнімдерінің құра­мынан генетикалық өзгерістер анықталған жоқ», – дейді зертханашы.