Отандық өндірісте қымыз бен шұбат дайындау арқылы тұтынушылардың ризашылығына ие болған Алматы облысындағы «Дәулет-Бекет» ЖШС өз өнімінің түрлерін көбейтпекші. Серіктестіктің жаңа сауда маркасымен дайындалған кілегейі мен құрты тұтынушылардың қолына тигеніне де көп бола қойған жоқ. Ал жақын күндері түйе жүнін өңдеп, бұйымдар шығара бастамақ.
Қазір «Дәулет-Бекет» шаруашылығының иелігінде 4 мың бастан астам түйе бар. Бірнеше жылдан бері отандық нарыққа шұбатты шығыстық сипаттағы пластик бөтелкеде шығарып келе жатқан серіктестік қымызхана мен шұбатхана деген атауға ие болған киіз үйлерде де жаз маусымында ұлттық сусындарын ұсынып келеді. Мәселен, олардың өткен жылы 800 тонна шұбаты саудаланыпты. Алғашында тек маусымдық жұмыс ретінде басталған түйе сауу ісі арнайы салынған ферманың арқасында биыл тұңғыш рет жыл бойы үздіксіз жүргізілді.
Қазір түйе қырқу науқаны қызу жүріп жатыр. Бүгінге дейін 5 тоннаға жуық жүн қырқылған. Бұрын шикізат ретінде сатылған түйе жүні қазір шаруашылықтың өзінде өңделе бастады. Қаптамадағы түйе жүні енді супермаркеттерде сатылатын болады. Ертеректе ата-бабаларымыз оны буын ауруларына ем ретінде пайдаланған. Сондықтан түйе жүнін тұтынушылардың қазіргі кезде де табылатынына күмән жоқ. Алдағы уақытта серіктестік түйе жүнінен шұлық, белбеу, көрпе, кілем және басқа да бұйымдар жасауды көздеп отыр.
Сыдық ДӘУЛЕТОВ, «Дәулет – Бекет» ЖШС директоры:
– Шаруашылықта тәулігіне 500 түйе үш реттен сауылады. Одан шамамен 2,5 тонна сүт шығып, өңделеді. Біз енді тек шұбатпен шектелмей, калориялы өнімдер шығаруды қолға ала бастадық. Кілегей мен құртта ешқандай консерванттар қосылмағандықтан, онда көптеген пайдалы аминқышқылдар сақталады. Жуық арада түйе жүнінен киімдер мен тұрмыстық бұйымдар әзірлеуге дайындалып жатырмыз. Бұл ретте Елбасы айтқан кластерлік жүйені дамытып, өңдеу саласына үлес қосатын боламыз.
Түйенің сүті де ем, жүні де ем
Последние статьи автора